Ádilet vitse-ministri Botagóz Jaqselekovaǵa kólikti 5 minýttan artyq jylytýǵa salynatyn aiyppul týraly normany ózgertý úshin qandai zańnamalyq sharttar qajet ekeni týraly suraq qoiyldy, dep habarlaidy Dalanews.kz.
Buǵan deiin Májilis depýtaty Serik Erýbaev sýyq mezgilde kólikti 5 minýttan artyq qyzdyrǵany úshin aiyppul salý normasyn qaita qaraýdy usynǵan bolatyn.
Botagóz Jaqselekovanyń aitýynsha, Ákimshilik quqyqbuzýshylyq týraly kodekske (ÁQBtK) engiziletin barlyq túzetýler Ádilet ministrligi basqaratyn tiisti vedomstvoaralyq komissiiada qaralady.
“Komissiia quramyna tek múddeli memlekettik organdar ǵana emes, sonymen qatar Parlament depýtattary, ǵylymi qaýymdastyq ókilderi de kiredi. Sebebi ózgeristerdi, onyń ishinde quqyqbuzýshylyq quramy men sanktsiialaryn teńgerimdi túrde engizý mańyzdy. Bul jaǵdaida eger depýtattyq saýal túsken bolsa, másele talqylaýǵa shyǵarylyp, qarastyrylady. Qaraý nátijeleri boiynsha qosymsha habarlanady dep oilaimyn”, – dedi Botagóz Jaqselekova Senat kýlýarynda.
Ol vedomstvoaralyq komissiia quramyna shamamen 10 memlekettik organ kiretinin atap ótti. Degenmen, qaralatyn taqyrypqa bailanysty basqa da múddeli laýazymdy tulǵalardyń qatysýyna shekteý qoiylmaitynyn aitty.
Eske salaiyq, buǵan deiin kólikti bes minýttan artyq qyzdyrǵandarǵa aiyppul salynatynyn habarlaǵan edik. Aiyppul mólsheri ailyq eseptik kórsetkishtiń kóterilýine bailanysty 18 460 teńgeden 19 660 teńgege ósti.
Qazaqstanda turǵyn aimaqtarda qozǵaltqyshy qosylyp turǵan kólikti qoiýǵa tyiym salynǵan. Qozǵaltqyshy qosýly kólikti 5 minýttan artyq turaqqa qoiǵany úshin 5 AEK (19 660 teńge) mólsherinde aiyppul qarastyrylǵan, al qaitalanǵan jaǵdaida – 10 AEK (39 320 teńge).
Senator Qojaevtyń aitýynsha, bul burynnan qoldanysta bar norma jáne ol ekologiialyq talaptardyń saqtalýyn qamtamasyz etý maqsatynda engizilgen.
