Avıasıa – bul tehnologıanyń, dáldiktiń jáne adam eńbeginiń sınergıasy. Árbir sátti oryndalǵan reıs kóp jaǵdaıda kózden tasa bolyp jatady. Alaıda bul - myńdaǵan mamannyń úılesimdi jumys nátıjesi ekenin eskergen jón. Astana halyqaralyq áýejaıy – elimizdiń áýe qozǵalysynyń júregi, munda qaýipsizdik, jaılylyq jáne tıimdilik birinshi orynda. Endeshe avıasıa kúni qarsańynda atalǵan áýe qatynasynyń senimdiligi men qolaılyǵyn qamtamasyz etetin mamandardyń eńbegi, naqty derekter men áýejaıdyń damý baǵyttary týraly aıta keteıik, dep habarlaıdy Dalanews.kz.

2000 maman: táýlik boıy jumys isteıtin ujym

Astana halyqaralyq áýejaıynda 2000-nan astam qyzmetker áýe qaýipsizdigin qamtamasyz etýge atsalysady. Avıasıalyq qaýipsizdik qyzmeti táýlik boıy áýejaıdaǵy jaǵdaıdy qadaǵalap, árbir júkti muqıat tekserip, áýe kemesine kirý múmkindigin qaýipsiz etedi, kınologtar yqtımal qaýipterdiń aldyn alady. Jer ústi qyzmetteri áýe kemelerin ushýǵa daıyndap, muzǵa qarsy óńdeý júrgizedi jáne áýe kemesiniń aýadaǵy turaqtylyǵyna áser etetin bagaj balansyn baqylaıdy. Dıspecherler men ramp-agentter áýe kemeleriniń jerdegi naqty qozǵalysyn qamtamasyz etedi, al órt sóndirý qyzmeti tótenshe jaǵdaı kezinde dereý áreket etý úshin árdaıym daıyn.

2024 jyly áýejaı mamandarynyń jumysynyń arqasynda 107 tyıym salynǵan zat jáne tasymaldaýǵa shekteý qoıylǵan 27 552 zat anyqtaldy. Kınologtar men qyzmettik ıtter qaýip-qaterdiń aldyn alatyn jáne ushý qaýipsizdigin qatań baqylaıtyn — «kózge túspeıtin» naǵyz saqshylar. Elorda áýejaıynyń erekshe qajettilikteri bar jolaýshylary árqashan nazarda. Bıyl Astana áýejaıy múmkindigi shekteýli 31 019 jolaýshyǵa qyzmet kórsetip, olardyń jaıly ári kedergisiz qozǵalysy úshin eńbek etti.

Aıtarlyqtaı ósim men jolaýshylar aǵyny

Astana halyqaralyq áýejaıynda jolaýshylar sany jyl saıyn artyp keledi. 2024 jyly elorda áýejaıynda 8 315 108 jolaýshyǵa qyzmet kórsetildi, bul ótken jylmen salystyrǵanda 11%-ǵa artyq kórsetkish. İshki áýe qatynasy 9 paıyzǵa, halyqaralyq - 16 paıyzǵa ósti.

• İshki áýe tasymaly – 5 668 234 jolaýshy (+9%).

• Halyqaralyq áýe tasymaly – 2 646 874 jolaýshy (+16%). 

Saıahattaý yńǵaıly bolyp, baǵyttardyń sany da arta tústi.

Áýejaıda reıster jıiligin arttyrý ári jańa baǵyttar sanyn keńeıtý boıynsha belsendi jumys júrgizilýde. Ótken jyly Eýropaǵa, Taıaý Shyǵysqa, Ońtústik-SHyǵys Azıaǵa jáne TMD elderine áýe reısteri qaıta jandandy. Álemniń iri qalalaryna, sonyń ishinde Abý-Dabı, Seýl, Tbılısı, Praga, Sankt-Peterbýrgke, sondaı-aq Kamran, Bodrým jáne Phýket sıaqty tanymal týrısik baǵyttarǵa ushý jıiligi ulǵaıtyldy.

2024 jyly alǵash ret Dýshanbe, Fýkýok, Phýket jáne Mılan qalalaryna reıster ashyldy.

Bul ósim Qazaqstannyń tranzıttik áleýetin damytýǵa, áýejaıdyń halyqaralyq hab retindegi ustanymyn nyǵaıtýǵa yqpal etedi.

Júk tasymaly: jańa rekordtar

Áýejaıdyń logıstıkalyq áleýeti kúsheıip keledi. Jyl ishinde 12 470 824 keli júk pen poshta óńdeldi, bul ótken jylmen salystyrǵanda 39 paıyzǵa artyq. Bul rette halyqaralyq júk tasymaly 78%-ǵa ósti, bul jahandyq logıstıkada áýejaı bedeliniń kóterilip kele jatqanyn kórsetedi.

Zamanaýı ınfraqurylym – jańa múmkindikter

Elorda áýejaıy ushý qaýipsizdigin barynsha qamtamasyz etýge taǵy bir qadam jasady. Astana áýejaıynda halyqaralyq standarttarǵa tolyq saı keletin ushaqtardy evakýasıalaýǵa arnalǵan zamanaýı qural-jabdyqtar usynyldy. Atalmysh tehnıka kez kelgen ushaqpen, sonyń ishinde eń iri Airbus A350 jáne Boeing 747-8 ushaqtarymen jumys isteýge qabiletti.

Sonymen qatar áýejaı órt sóndirý kólikteriniń álemdegi eń ozyq úlgileriniń biri – Rosenbauer Panther 6x6 elimizde birinshi bolyp Astana halyqaralyq áýejaıynda paıda boldy. Ol Avstrıadaǵy Rosenbauer International AG zaýytynda óndirilgen jáne eń joǵary qaýipsizdik talaptaryna jaýap beredi. Bul oqıǵa ornyna tez jetip, kez kelgen tótenshe jaǵdaıǵa jedel áreket ete alatyn biregeı tehnıka.

Rosenbauer Panther 6x6 kóligi nebári 30 sekýndta 80 km/saǵ jyldamdyqqa jetedi, bul tótenshe jaǵdaı aımaǵyna qysqa merzimde jetýge múmkindik beredi. Eń joǵary jyldamdyǵy 115 km/saǵ, bul ony óz klasyndaǵy eń jyldam kólikterdiń biri etedi. Órt sóndirý kóliginiń arnaıy dızaıny 50%-ǵa deıingi eńisterdi eńserip, 30 gradýsqa deıingi búıirlik eńisterge tótep bere otyryp, tipti qıyn jerlerde de senimdi qozǵalýǵa múmkindik beredi.

Órt sóndirý úshin Rosenbauer Panther 12500 lıtrlik sý ydysymen, 1500 lıtrlik kóbikti rezervýarmen jáne 250 kg untaqpen sóndirý júıesimen jabdyqtalǵan. Sorǵy mınýtyna 9 000 lıtrge deıin sý beredi, al aǵynnyń dıapazony 100 metrge jetedi. Osynyń barlyǵy órtterdi múmkindiginshe tezirek oqshaýlaýǵa jáne yqtımal zardaptardy azaıtýǵa múmkindik beredi.

Sonymen qatar, áýejaıdyń apattyq-qutqarý qyzmetiniń jumyskerleri áýe kemelerindegi órtterdi sóndirýdiń túrli senarılerin jattyqtyra otyryp, arnaıy daıyndyqtan ótti. Mundaı tehnologıany engizý áýejaıǵa ushý qaýipsizdigin tolyq qamtamasyz etedi.

Bolashaq: jańa sapa standarttary

2025 jyldyń qańtarynda Astana qalasynyń ákimdigi men «Terminals Astana Airport Management» JSHS arasynda jańa senimgerlik basqarý sharty jasaldy. Qazirgi ýaqytta ınvestor men qazaqstandyq tarap arasynda uzaq merzimdi ınvestısıalyq kelisim jasaý jumystary júrgizilýde. Óz kezeginde ınvestor jolaýshylar aǵynynyń ósýin eskere otyryp, qoldanystaǵy ushý-qoný jolaǵyn qaıta qurýdy, ekinshi ushý-qoný jolaǵyn salýdy, termınaldardy keńeıtýdi jáne jańa termınal salýdy josparlap otyr. Sondaı-aq ınvestor áýejaıdyń qazirgi ınfraqurylymymen jumys istep, avıakompanıalardy kóbirek tarttyryp, marshrýttar jelisin keńeıtedi, sondaı-aq jolaýshylar aǵynyn arttyrý boıynsha jumystar júrgizedi.

Avıasıa kúni – áýe qatynasyn damytyp, elder men kóptegen júrekti toǵystyratyn jandardyń merekesi

Astana halyqaralyq áýejaıynyń myńdaǵan qyzmetkeri – jolaýshylardyń kózine túspese de, olardyń sátti sapar jasaýy úshin asa mańyzdy jumysty atqaryp júrgen mamandar.

Avıasıa salasyndaǵy barsha jandy kásibı merekesimen quttyqtaımyz!

Aspan árdaıym ashyq, ár reıs sátti bolsyn!