Qazgidromet qarasha aiyna arnalǵan konsýltativtik aýa raiy boljamyn usyndy. Mamandardyń málimetinshe, aidyń basynda el aýmaǵynyń basym bóliginde soltústik tsiklon áserinen turaqsyz aýa raiy kútiledi, dep habarlaidy Dalanews.kz.
Birinshi onkúndikte jańbyr qarǵa ulasýy múmkin, al soltústik, ortalyq jáne shyǵys óńirlerde burqasyn baiqalady. Batys aimaqtarda jaýyn-shashyn aidyń alǵashqy kúnderinde túsedi. Uqsas aýa raiy jaǵdailary qarashanyń ekinshi jáne úshinshi onkúndikterinde de qaitalanbaq.
Sinoptikterdiń boljamynsha, ai boiy jeldiń kúsheiýi, kóktaiǵaq pen tuman jii qaitalanady. Al burqasyn negizinen eldiń soltústik, ortalyq jáne shyǵys aimaqtarynda kútiledi.
Temperatýralyq fon boiynsha:
-
Batys óńirlerde túnde +2…-7°S, kúndiz +3…+18°S aralyǵynda bolady, onkúndiktiń sońynda +25°S-qa deiin jyly bolýy yqtimal.
-
Soltústik, ortalyq jáne shyǵys aimaqtarda túnde -7…-15°S, kúndiz -2…-10°S shamasynda saqtalady.
-
Ońtústik jáne ońtústik-shyǵysta túnde 0…-5°S, al kúndiz 0…+8°S bolady. 7 qarashadan keiin temperatýra +5…+15°S-qa deiin kóteriledi.
Aidyń ekinshi jáne úshinshi onkúndikterinde kei óńirlerde aiazdar kúsheiip, túngi temperatýra -15…-20°S-qa deiin tómendeýi múmkin.
Jalpy, qarasha aiynda aýa temperatýrasy el boiynsha normadan shamamen 1°S joǵary bolady dep kútilýde.
Jaýyn-shashyn mólsheri respýblika aýmaǵynyń basym bóliginde normaǵa jýyq bolady. Al batys jáne soltústik-shyǵys óńirlerde (Soltústik Qazaqstan, Aqmola, Shyǵys Qazaqstan oblystary men Batys Qazaqstan, Pavlodardyń basym bóligi, sondai-aq Atyraý men Mańǵystaýdyń batysy) normadan kóp jaýyn-shashyn kútiledi.
