قازگيدرومەت قاراشا ايىنا ارنالعان كونسۋلتاتيۆتىك اۋا رايى بولجامىن ۇسىندى. مامانداردىڭ مالىمەتىنشە، ايدىڭ باسىندا ەل اۋماعىنىڭ باسىم بولىگىندە سولتۇستىك سيكلون اسەرىنەن تۇراقسىز اۋا رايى كۇتىلەدى، دەپ حابارلايدى Dalanews.kz.

ءبىرىنشى ونكۇندىكتە جاڭبىر قارعا ۇلاسۋى مۇمكىن، ال سولتۇستىك، ورتالىق جانە شىعىس وڭىرلەردە بۇرقاسىن بايقالادى. باتىس ايماقتاردا جاۋىن-شاشىن ايدىڭ العاشقى كۇندەرىندە تۇسەدى. ۇقساس اۋا رايى جاعدايلارى قاراشانىڭ ەكىنشى جانە ءۇشىنشى ونكۇندىكتەرىندە دە قايتالانباق.

سينوپتيكتەردىڭ بولجامىنشا، اي بويى جەلدىڭ كۇشەيۋى، كوكتايعاق پەن تۇمان ءجيى قايتالانادى. ال بۇرقاسىن نەگىزىنەن ەلدىڭ سولتۇستىك، ورتالىق جانە شىعىس ايماقتارىندا كۇتىلەدى.

تەمپەراتۋرالىق فون بويىنشا:

• باتىس وڭىرلەردە تۇندە +2…-7°س، كۇندىز +3…+18°س ارالىعىندا بولادى، ونكۇندىكتىڭ سوڭىندا +25°س-قا دەيىن جىلى بولۋى ىقتيمال.

• سولتۇستىك، ورتالىق جانە شىعىس ايماقتاردا تۇندە -7…-15°س، كۇندىز -2…-10°س شاماسىندا ساقتالادى.

• وڭتۇستىك جانە وڭتۇستىك-شىعىستا تۇندە 0…-5°س، ال كۇندىز 0…+8°س بولادى. 7 قاراشادان كەيىن تەمپەراتۋرا +5…+15°س-قا دەيىن كوتەرىلەدى.

ايدىڭ ەكىنشى جانە ءۇشىنشى ونكۇندىكتەرىندە كەي وڭىرلەردە ايازدار كۇشەيىپ، تۇنگى تەمپەراتۋرا -15…-20°س-قا دەيىن تومەندەۋى مۇمكىن.

جالپى، قاراشا ايىندا اۋا تەمپەراتۋراسى ەل بويىنشا نورمادان شامامەن 1°س جوعارى بولادى دەپ كۇتىلۋدە.

جاۋىن-شاشىن مولشەرى رەسپۋبليكا اۋماعىنىڭ باسىم بولىگىندە نورماعا جۋىق بولادى. ال باتىس جانە سولتۇستىك-شىعىس وڭىرلەردە (سولتۇستىك قازاقستان، اقمولا، شىعىس قازاقستان وبلىستارى مەن باتىس قازاقستان، پاۆلوداردىڭ باسىم بولىگى، سونداي-اق اتىراۋ مەن ماڭعىستاۋدىڭ باتىسى) نورمادان كوپ جاۋىن-شاشىن كۇتىلەدى.