Búgin Semeide Parlament Senatynyń Agroónerkásiptik keshendi jáne aýyldyq aýmaqtardy damytý máseleleri jónindegi komitetiniń kóshpeli otyrysy ótti, dep habarlaidy Dalanews.kz.
Jiynǵa oblys ákimi Berik Ýáli, Parlament Senatynyń Agroónerkásiptik keshendi jáne aýyldyq aýmaqtardy damytý máseleleri jónindegi komitetiniń tóraǵasy Áli Bektaev, Parlament Senatynyń depýtattary, Aýyl sharýashylyǵy, Ulttyq ekonomika ministrleriniń orynbasary, Birikken Ulttar Uiymynyń Azyq-túlik jáne aýylsharýashylyq uiymynyń ókili, máslihat depýtattary, oblystyń aýyl sharýashylyǵy taýaryn óndirýshiler qatysty.
Otyrysta sóz sóilegen aimaq basshysy alqaly jiynnyń óńir úshin mańyzdy ekenin atap ótti.
«Prezidentimiz biylǵy Joldaýynda aýyl sharýashylyǵy salasyna qatysty birqatar mańyzdy máselelerge nazar aýdardy. Biylǵy 9 aida oblystyń mal sharýashylyǵynda naqty kólem indeksi 105 % deńgeiinde qalyptasyp otyr. Jańasemei aýdanynda quny 7,7 mlrd teńgege iri et kombinatynyń qurylysy júrgizilýde. 2026 jyldyń tamyz aiynda iske qosylady dep josparlanyp otyr. Bul joba aýyl sharýashylyǵyn damytýǵa jańa serpin beredi degen senimdemiz. 2028 jylǵa deiin oblysymyzda aýyl sharýashylyǵy salasynda investitsiialyq jobalardy iske asyrý Jol kartasyna sáikes 22 iri agrojoba iske asyrylyp, 500-den astam jańa jumys oryndary ashylmaq. Sonymen qatar, aýyldardy damytýǵa biz árdaiym jan-jaqty qoldaý kórsetip kelemiz. Oblys qurylǵan 3 jyl ishinde «Aýyl – el besigi» baǵdarlamasy aiasynda jalpy quny 21,2 mlrd teńgeni quraityn 191 joba júzege asyryldy», - dedi oblys ákimi.
Parlament Senatynyń Agroónerkásiptik keshendi jáne aýyldyq aýmaqtardy damytý máseleleri jónindegi komitetiniń tóraǵasy Áli Bektaev Abai oblysynyń aýyl sharýashylyǵy salasynyń áleýeti zor ekenin aitty.
«Óńirdiń aýyl sharýashylyǵynda turaqty ósý baiqalady. Toǵyz aida 339,5 mlrd teńgege ónim óndirildi. Et klasterin, sút fermalaryn qurýdy, qus sharýashylyǵy men sýarýdy damytýdy qamtityn AÓK-ni 2028 jylǵa deiin damytý modeli ázirlendi. Degenmen, qazirgi tańda oblystyń agroónerkásiptik kesheninde sheshýdi qajet etetin birqatar ózekti máseleler bar. Oblys aýmaǵyndaǵy aýyl sharýashylyǵy jerleriniń ónimdiligi basqa óńirmen salystyrǵanda tómen jáne sýarmaly jerlerdiń úlesi jetkiliksiz. Aýyldyq infraqurylymnyń damýy men jol, bailanys, internet jelisiniń qoljetimdiligi de óńirdiń básekege qabilettiligin tejep otyr. Osy máselelerdi talqylap, tiisti sheshimin tabý úshin búgin biz barlyq múddeli taraptardy – Parlament depýtattaryn, Ortalyq atqarýshy organdar men jergilikti atqarýshy organ ókilderin, sarapshylardy, fermerler men qaita óńdeýshi kásipkerlerdi bir alańda jinadyq», - dedi ol.
Otyrysta óńirdiń aýyl sharýashylyǵy salasy, aýyldardyń jaǵdaiy men damý áleýeti talqylandy. Jiynda oblys ákiminiń orynbasary Dýman Ospanov, aýyl sharýashylyǵy vitse-ministri Erbol Tasjúrekov, ulttyq ekonomika vitse-ministri Baýyrjan Omarbekov, Birikken Ulttar Uiymynyń Azyq-túlik jáne aýylsharýashylyq uiymynyń baǵdarlama úilestirýshisi Jańyl Bozaeva jáne oblystyń jetekshi sharýa qojalyqtarynyń basshylary baiandama jasady. Kóshpeli otyrys qorytyndysynda barlyq usynystar men sheshimder jinaqtalyp, Úkimetke joldanady.
Shara sońynda óńirdiń úzdik sharýalaryna Parlament Senatynyń tóraǵasy men Parlament Senatynyń Agroónerkásiptik keshendi jáne aýyldyq aýmaqtardy damytý máseleleri jónindegi komitetiniń Alǵys haty tapsyryldy.
