بۇگىن سەمەيدە پارلامەنت سەناتىنىڭ اگروونەركاسىپتىك كەشەندى جانە اۋىلدىق اۋماقتاردى دامىتۋ ماسەلەلەرى جونىندەگى كوميتەتىنىڭ كوشپەلى وتىرىسى ءوتتى، دەپ حابارلايدى Dalanews.kz.

جيىنعا وبلىس اكىمى بەرىك ءۋالي، پارلامەنت سەناتىنىڭ اگروونەركاسىپتىك كەشەندى جانە اۋىلدىق اۋماقتاردى دامىتۋ ماسەلەلەرى جونىندەگى كوميتەتىنىڭ ءتوراعاسى ءالي بەكتايەۆ، پارلامەنت سەناتىنىڭ دەپۋتاتتارى، اۋىل شارۋاشىلىعى، ۇلتتىق ەكونوميكا مينيسترلەرىنىڭ ورىنباسارى، بىرىككەن ۇلتتار ۇيىمىنىڭ ازىق-تۇلىك جانە اۋىلشارۋاشىلىق ۇيىمىنىڭ وكىلى، ءماسليحات دەپۋتاتتارى، وبلىستىڭ اۋىل شارۋاشىلىعى تاۋارىن وندىرۋشىلەر قاتىستى.

وتىرىستا ءسوز سويلەگەن ايماق باسشىسى القالى جيىننىڭ ءوڭىر ءۇشىن ماڭىزدى ەكەنىن اتاپ ءوتتى.

«پرەزيدەنتىمىز بيىلعى جولداۋىندا اۋىل شارۋاشىلىعى سالاسىنا قاتىستى ءبىرقاتار ماڭىزدى ماسەلەلەرگە نازار اۋداردى. بيىلعى 9 ايدا وبلىستىڭ مال شارۋاشىلىعىندا ناقتى كولەم يندەكسى 105 % دەڭگەيىندە قالىپتاسىپ وتىر. جاڭاسەمەي اۋدانىندا قۇنى 7،7 ملرد تەڭگەگە ءىرى ەت كومبيناتىنىڭ قۇرىلىسى جۇرگىزىلۋدە. 2026 جىلدىڭ تامىز ايىندا ىسكە قوسىلادى دەپ جوسپارلانىپ وتىر. بۇل جوبا اۋىل شارۋاشىلىعىن دامىتۋعا جاڭا سەرپىن بەرەدى دەگەن سەنىمدەمىز. 2028 جىلعا دەيىن وبلىسىمىزدا اۋىل شارۋاشىلىعى سالاسىندا ينۆەستيسيالىق جوبالاردى ىسكە اسىرۋ جول كارتاسىنا سايكەس 22 ءىرى اگروجوبا ىسكە اسىرىلىپ، 500-دەن استام جاڭا جۇمىس ورىندارى اشىلماق. سونىمەن قاتار، اۋىلداردى دامىتۋعا ءبىز ءاردايىم جان-جاقتى قولداۋ كورسەتىپ كەلەمىز. وبلىس قۇرىلعان 3 جىل ىشىندە «اۋىل – ەل بەسىگى» باعدارلاماسى اياسىندا جالپى قۇنى 21،2 ملرد تەڭگەنى قۇرايتىن 191 جوبا جۇزەگە اسىرىلدى»، - دەدى وبلىس اكىمى.

پارلامەنت سەناتىنىڭ اگروونەركاسىپتىك كەشەندى جانە اۋىلدىق اۋماقتاردى دامىتۋ ماسەلەلەرى جونىندەگى كوميتەتىنىڭ ءتوراعاسى ءالي بەكتايەۆ اباي وبلىسىنىڭ اۋىل شارۋاشىلىعى سالاسىنىڭ الەۋەتى زور ەكەنىن ايتتى.

«ءوڭىردىڭ اۋىل شارۋاشىلىعىندا تۇراقتى ءوسۋ بايقالادى. توعىز ايدا 339،5 ملرد تەڭگەگە ءونىم ءوندىرىلدى. ەت كلاستەرىن، ءسۇت فەرمالارىن قۇرۋدى، قۇس شارۋاشىلىعى مەن سۋارۋدى دامىتۋدى قامتيتىن اوك-نى 2028 جىلعا دەيىن دامىتۋ مودەلى ازىرلەندى. دەگەنمەن، قازىرگى تاڭدا وبلىستىڭ اگروونەركاسىپتىك كەشەنىندە شەشۋدى قاجەت ەتەتىن ءبىرقاتار وزەكتى ماسەلەلەر بار. وبلىس اۋماعىنداعى اۋىل شارۋاشىلىعى جەرلەرىنىڭ ونىمدىلىگى باسقا وڭىرمەن سالىستىرعاندا تومەن جانە سۋارمالى جەرلەردىڭ ۇلەسى جەتكىلىكسىز. اۋىلدىق ينفراقۇرىلىمنىڭ دامۋى مەن جول، بايلانىس، ينتەرنەت جەلىسىنىڭ قولجەتىمدىلىگى دە ءوڭىردىڭ باسەكەگە قابىلەتتىلىگىن تەجەپ وتىر. وسى ماسەلەلەردى تالقىلاپ، ءتيىستى شەشىمىن تابۋ ءۇشىن بۇگىن ءبىز بارلىق مۇددەلى تاراپتاردى – پارلامەنت دەپۋتاتتارىن، ورتالىق اتقارۋشى ورگاندار مەن جەرگىلىكتى اتقارۋشى ورگان وكىلدەرىن، ساراپشىلاردى، فەرمەرلەر مەن قايتا وڭدەۋشى كاسىپكەرلەردى ءبىر الاڭدا جينادىق»، - دەدى ول.

وتىرىستا ءوڭىردىڭ اۋىل شارۋاشىلىعى سالاسى، اۋىلداردىڭ جاعدايى مەن دامۋ الەۋەتى تالقىلاندى. جيىندا وبلىس اكىمىنىڭ ورىنباسارى دۋمان وسپانوۆ، اۋىل شارۋاشىلىعى ۆيسە-مينيسترى ەربول تاسجۇرەكوۆ، ۇلتتىق ەكونوميكا ۆيسە-مينيسترى باۋىرجان وماربەكوۆ، بىرىككەن ۇلتتار ۇيىمىنىڭ ازىق-تۇلىك جانە اۋىلشارۋاشىلىق ۇيىمىنىڭ باعدارلاما ۇيلەستىرۋشىسى جاڭىل بوزايەۆا جانە وبلىستىڭ جەتەكشى شارۋا قوجالىقتارىنىڭ باسشىلارى بايانداما جاسادى. كوشپەلى وتىرىس قورىتىندىسىندا بارلىق ۇسىنىستار مەن شەشىمدەر جيناقتالىپ، ۇكىمەتكە جولدانادى.

شارا سوڭىندا ءوڭىردىڭ ۇزدىك شارۋالارىنا پارلامەنت سەناتىنىڭ ءتوراعاسى مەن پارلامەنت سەناتىنىڭ اگروونەركاسىپتىك كەشەندى جانە اۋىلدىق اۋماقتاردى دامىتۋ ماسەلەلەرى جونىندەگى كوميتەتىنىڭ العىس حاتى تاپسىرىلدى.