Qazaqstanda Prezident Qasym Jomart Toqaevqa degen senim deńgeii 86,7%-dy qurady, dep habarlaidy dalanews.kz.
Mundai málimet Qazaqstan Respýblikasy Prezidenti janyndaǵy Qazaqstannyń strategiialyq zertteýler institýtynyń tapsyrysy boiynsha 2026 jylǵy sáýir aiynda júrgizilgen qoǵamdyq pikir saýalnamasynyń nátijesinde belgili boldy.
Zertteý qorytyndysyna sáikes, el Prezidentine degen senim kórsetkishi sońǵy jyldary turaqty joǵary deńgeide saqtalyp keledi. QSZI málimetinshe, bul qoǵamnyń eldi jańǵyrtýǵa jáne júieli reformalar baǵytyna turaqty qoldaý bildiretinin kórsetedi.
Saýalnama nátijesinde Prezidentke eń joǵary senim deńgeii jastar arasynda tirkelgen. Atap aitqanda, jastardyń 91,4%-y Memleket basshysyna senim bildirgen.
Zertteýshiler muny jastardyń memleket usynatyn bilim granttaryn, túrli baǵdarlamalardy, tsifrlyq qyzmetter men qoldaý tetikterin belsendi paidalanýymen bailanystyrady. Sonymen qatar búgingi jastar eldiń qarqyndy damý kezeńinde qalyptasyp kele jatqany da olardyń kózqarasyna áser etkeni aitylǵan.
Qala jáne aýyl turǵyndary arasynda da Prezidentke degen senim deńgeii joǵary bolyp qalǵan.
Atap aitqanda:
— qala turǵyndarynyń 86,9%-y;
— aýyl halqynyń 86,7%-y Prezidentke senim bildirgen.
Zertteý avtorlary senim deńgeii uqsas bolǵanymen, onyń mazmuny ártúrli ekenin atap ótti.
Aýyl turǵyndary memleketpen kóbine infraqurylymdyq jobalar, áleýmettik baǵdarlamalar men tólemder arqyly bailanys ornatsa, qala turǵyndarynyń senimi júieli ózgeristerdi qabyldaý jáne olardyń nátijelerin baǵalaýmen kóbirek bailanysty ekeni aitylǵan.
Saýalnama barysynda áielder arasynda Prezidentke senim deńgeii erlerge qaraǵanda 3,8%-ǵa joǵary ekeni anyqtalǵan.
Sonymen qatar bilim deńgeiine qarai júrgizilgen taldaý Prezidentke degen senim kórsetkishinde aitarlyqtai aiyrmashylyq joǵyn kórsetken.
QSZI málimetinshe, respondentterdiń bilim deńgeiine qaramastan, bul kórsetkish barlyq topta turaqty joǵary deńgeide saqtalǵan.
Zertteý nátijesinde azamattardyń satyp alý qabileti artqan saiyn Prezidentke degen senim deńgeii de ósetini baiqalǵan.
Sarapshylar muny halyqtyń ekonomikalyq jaǵdaidy oń baǵalaýy men Memleket basshysynyń júrgizip otyrǵan saiasatyn qoldaýy arasyndaǵy ózara bailanyspen túsindiredi.
«Alynǵan derekter Prezidentke degen senimniń turaqty sipatqa ie ekenin jáne onyń bilim deńgeiine táýeldi emestigin, qala men aýyl turǵyndary arasynda aitarlyqtai aiyrmashylyq baiqalmaitynyn, sondai-aq barlyq jas toptarynda joǵary ekenin kórsetedi. Bul óz kezeginde eldi damytý saiasatyna júieli qoǵamdyq qoldaýdyń bar ekenin aiǵaqtaidy», – delingen zertteý qorytyndysynda.
Áleýmettanýlyq saýalnama QSZI tapsyrysy boiynsha 2026 jylǵy 10 sáýir men 10 mamyr aralyǵynda júrgizilgen.
Iriktemelik jiyntyq kólemi — 8 myń respondent.
Saýalnamaǵa 18 jastan asqan azamattar qatysqan. Zertteý elimizdiń 17 oblysyn jáne respýblikalyq mańyzy bar Astana, Almaty jáne Shymkent qalalaryn qamtyǵan.
