Qazaqstanda 2026 jyldyń 1 qańtarynan bastap jańa Salyq kodeksi kúshine enedi. Sonyń aiasynda kólik salyǵyn tóleý tártibi men mólsherinde ózgerister engiziledi, dep habarlaidy Dalanews.kz.
Kólik salyǵy – kólik quralyn ielengeni úshin memleketke tólenetin jyl saiynǵy tólem. Eger avtokólik nemese esepke alynatyn ózge de kólik quraly sizdiń atyńyzda tirkelgen bolsa, onda siz jyl saiyn osy salyqty tóleýge mindettisiz.
Salyqty kólik iesi ózi esepteidi jáne tólemdi esepti jyldan keiingi jyldyń 1 sáýirine deiin tóleý qajet. Salyq kólik tirkelgen kúnnen bastap, ol esepten alynǵan kúnge deiin esepteledi.
Kólik salyǵy qalai esepteledi?
Salyq mólsheri kóliktiń:
- túrine,
- qozǵaltqysh kólemine nemese qýatyna,
- júk kótergishtigi men oryn sanyna bailanysty anyqtalady.
2026 jyldan bastap qandai ózgerister bolady?
Jańa Salyq kodeksine sáikes, 2026 jyldan bastap kólik salyǵy kóliktiń paidalaný merzimine qarai túzetkish koeffitsienttermen esepteledi:
- 10 jyldan 20 jylǵa deiin paidalanylǵan kólikter úshin — 0,7 koeffitsienti;
- 20 jyldan asqan kólikter úshin — 0,5 koeffitsienti qoldanylady.
Iaǵni, kólik neǵurlym eski bolsa — soǵurlym salyq mólsheri azaiady.
Kimder kólik salyǵynan bosatylady?
Bir avtokólikke qatysty tómendegi azamattar kólik salyǵynan bosatylady:
- soǵys jáne eńbek ardagerleri;
- «Halyq qaharmany», «Qazaqstannyń Eńbek Eri» ataqtarynyń iegerleri;
- «Otan» ordeniniń kavalerleri;
- kóp balaly analar («Altyn alqa», «Kúmis alqa»);
- múgedektigi bar adamdar.
Alaida jeńil avtokóliktiń qozǵaltqysh kólemi 4000 tekshe sm-den joǵary jáne ol 2013 jyldyń 31 jeltoqsanynan keiin qaita rásimdelgen bolsa, bul jeńildik qoldanylmaidy.
Eske salaiyq, 2026 jyldyń 1 qańtarynan bastap Qazaqstanda jańa Salyq kodeksi kúshine enedi. Ol jeke tulǵalardyń salyq salý júiesine, salyq tóleý tártibine jáne bereshekti óndirý sharalaryna eleýli ózgerister engizedi.
