Qazaqstanda benzin men suiytylǵan gaz baǵalaryna qatysty buǵan deiin qoldanylyp kelgen memlekettik retteý tetigi joiylyp, bul fýnktsiianyń naryqtyń ózine qaldyrylǵaly jatqany aldynda jariia etilgen. Árine, bul baǵanyń qymbattaitynyn bildireri anyq. Búgingi Úkimettiń keńeitilgen otyrysynda da osyny baiqatqan Úkimet basshysy Oljas Súleimenov alystan oraǵytyp, qysqa-nusqa: "Janar-jaǵarmai baǵasynyń qatty ósýine jol bermeimiz" dei saldy. Árine, buǵan qanaǵattanbaǵan jýrnalister qaýymy oraiy kelgende Energetika ministri Almasadam Sátqalievke tótesinen suraq qoidy, dep jazady Dalanews.kz.
"Janar-jaǵarmai materialdary boiynsha biz aǵymdaǵy jyldyń aqpan aiynan bastap baǵalardyń birtindep ósetinin kútip otyrmyz, suiytylǵan gaz úshin – jaqyn kúnderi. Taýarlyq gaz boiynsha naryqqa qatysýshylar úshin osy jyldyń jazynda baǵa alǵash ret kóteriledi dep kútiledi. Ortasha eseppen alǵanda, biz ótken jyly baǵany yryqtandyrýdyń birinshi kezeńine kirisip ketkenbiz. Baǵa aralyǵyn ulǵaittyq: bir jerde 54 teńge bolsa, bir jerde 85 teńgege deiin degendei. Qazirgi shek 59-dan 90 teńgege deiin. Eń joǵarǵy shekti shamamen 64-ten 98 teńgege deiingi deńgeide belgileimiz. Osy shekter boiynsha óńirlerge bailanysty baǵa kóteriledi", - dedi Sátqaliev Úkimette ótken brifingte.
Naqtylaýdy suraǵanda, ministr, máselen, bul №92 markaly janar-jaǵarmaidyń 1 litri 4 teńgege qymbattaýy múmkin degendi bildiretinin jetkizdi.
Árine, bul qymbatshylyq ózge taýarlardyń baǵalarǵa áser eteri sózsiz. Bul rette Úkimet áleýmettik mańyzy bar azyq-túlik taýarlary baǵasynyń kúrt ósýine jol bermeý úshin barlyq qajetti ákimshilik sharalardy qabyldaitynyn aitty.
Buǵan deiin saitymyzda "Benzin men dizel otyny qymbattaǵaly jatyr. Sarapshylar muny nege jaqsylyqqa balaidy" degen maqala jariialanǵan bolatyn.
