Қазақстан Үкіметінің кеңейтілген отырысында Премьер-министр Олжас Бектенов елімізде бағаны реттеуді (дерегуляция) кезең-кезеңімен жүзеге асыру жұмыстары басталғанын мәлімдеді, деп хабарлайды Dalanews.kz.
Оның айтуынша, бұл өзгерістер жанар-жағармай (ЖЖМ), газ, коммуналдық қызметтер мен теміржол тасымалы салаларын қамтиды.
“Үкімет жанар-жағармай мен газға, сонымен қатар тұрғын үй-коммуналдық шаруашылығы және теміржол тарифтеріне бағаны біртіндеп ырықтандыруда. Нарықтық бағаға жайлы өтудің арқасында осы салаларға қажетті инвестициялар тартылып, жанар-жағармай тапшылығының алдын алуға болады. Дегенмен күрт баға өсіміне жол бермеуге тырысамыз”, – деді Бектенов.
Сарапшылардың пікірінше, Қазақстандағы баға саясатының біртіндеп либерализациялануы – инфрақұрылымдық жобалар мен энергетика секторына жеке инвестицияларды тарту үшін жасалған маңызды қадам. Ал Үкімет халықтың әлеуметтік жағдайына теріс әсер етпес үшін баға өсімін “барынша бақылауда ұстайтынын” атап отыр.
