2026 жылдың екінші тоқсанында Қазақстан Еуропалық одақ елдеріне мұнай өнімдерін жеткізуші негізгі мемлекеттердің қатарына кіріп, екінші орынға көтерілді, деп хабарлайды dalanews.kz.
Еуроодақтың соңғы деректеріне сәйкес, мұнай өнімдерін жеткізу бойынша көш басында АҚШ тұр. Оның үлесі 18,5 пайызды құраған. Қазақстан 13,4 пайыздық көрсеткішпен екінші орынға шықса, Норвегия 12,4 пайызбен үшінші орынға жайғасқан.
Ал көмір жеткізу бойынша Қазақстан төртінші орында тұр. Еуроодаққа көмір экспорттайтын елдер арасында Австралия бірінші орында болса (29,7%), АҚШ екінші (28,3%), Колумбия үшінші (14,9%) орын алған. Қазақстанның үлесі 12,9 пайызды құрады.
Сарапшылардың мәліметінше, 2026 жылдың екінші тоқсанында Еуроодақтың мұнай өнімдерін импорттауға жұмсаған шығыны өткен жылдың осы кезеңімен салыстырғанда айтарлықтай өскен. Импорт құны 39,3 пайызға артқанымен, жеткізілген өнім көлемі небәрі 0,4 пайызға ғана көбейген.
Бұл Еуроодақтың энергия ресурстарын импорттауға жұмсаған қаржысының өсуіне негізінен әлемдік нарықтағы бағаның қымбаттауы әсер еткенін көрсетеді.
Айта кетейік, 2026 жылдың бірінші тоқсанында Қазақстан Еуроодаққа мұнай жеткізу көлемі бойынша үшінші орында болған еді. Ал екінші тоқсан қорытындысы бойынша еліміз бір саты жоғарылап, екінші орынға көтерілді.
