قازاقستاندا بەنزين مەن سۇيىتىلعان گاز باعالارىنا قاتىستى بۇعان دەيىن قولدانىلىپ كەلگەن مەملەكەتتىك رەتتەۋ تەتىگى جويىلىپ، بۇل فۋنكسيانىڭ نارىقتىڭ وزىنە قالدىرىلعالى جاتقانى الدىندا جاريا ەتىلگەن. ارينە، بۇل باعانىڭ قىمباتتايتىنىن بىلدىرەرى انىق. بۇگىنگى ۇكىمەتتىڭ كەڭەيتىلگەن وتىرىسىندا دا وسىنى بايقاتقان ۇكىمەت باسشىسى ولجاس سۇلەيمەنوۆ الىستان وراعىتىپ، قىسقا-نۇسقا: "جانار-جاعارماي باعاسىنىڭ قاتتى وسۋىنە جول بەرمەيمىز" دەي سالدى. ارينە، بۇعان قاناعاتتانباعان جۋرناليستەر قاۋىمى ورايى كەلگەندە ەنەرگەتيكا ءمينيسترى الماسادام ساتقالييەۆكە توتەسىنەن سۇراق قويدى، دەپ جازادى Dalanews.kz.

"جانار-جاعارماي ماتەريالدارى بويىنشا ءبىز اعىمداعى جىلدىڭ اقپان ايىنان باستاپ باعالاردىڭ بىرتىندەپ وسەتىنىن كۇتىپ وتىرمىز، سۇيىتىلعان گاز ءۇشىن – جاقىن كۇندەرى. تاۋارلىق گاز بويىنشا نارىققا قاتىسۋشىلار ءۇشىن وسى جىلدىڭ جازىندا باعا العاش رەت كوتەرىلەدى دەپ كۇتىلەدى. ورتاشا ەسەپپەن العاندا، ءبىز وتكەن جىلى باعانى ىرىقتاندىرۋدىڭ ءبىرىنشى كەزەڭىنە كىرىسىپ كەتكەنبىز. باعا ارالىعىن ۇلعايتتىق: ءبىر جەردە 54 تەڭگە بولسا، ءبىر جەردە 85 تەڭگەگە دەيىن دەگەندەي. قازىرگى شەك 59-دان 90 تەڭگەگە دەيىن. ەڭ جوعارعى شەكتى شامامەن 64-تەن 98 تەڭگەگە دەيىنگى دەڭگەيدە بەلگىلەيمىز. وسى شەكتەر بويىنشا وڭىرلەرگە بايلانىستى باعا كوتەرىلەدى"، - دەدى ساتقالييەۆ ۇكىمەتتە وتكەن بريفينگتە. 

ناقتىلاۋدى سۇراعاندا، مينيستر، ماسەلەن، بۇل №92 ماركالى جانار-جاعارمايدىڭ 1 ءليترى 4 تەڭگەگە قىمباتتاۋى مۇمكىن دەگەندى بىلدىرەتىنىن جەتكىزدى.

ارينە، بۇل قىمباتشىلىق وزگە تاۋارلاردىڭ باعالارعا اسەر ەتەرى ءسوزسىز. بۇل رەتتە ۇكىمەت الەۋمەتتىك ماڭىزى بار ازىق-تۇلىك تاۋارلارى باعاسىنىڭ كۇرت وسۋىنە جول بەرمەۋ ءۇشىن بارلىق قاجەتتى اكىمشىلىك شارالاردى قابىلدايتىنىن ايتتى.

بۇعان دەيىن سايتىمىزدا "بەنزين مەن ديزەل وتىنى قىمباتتاعالى جاتىر. ساراپشىلار مۇنى نەگە جاقسىلىققا بالايدى" دەگەن ماقالا جاريالانعان بولاتىن.