5 qarashada Jer men Aidyń araqashyqtyǵy eń az deńgeige — 356 832 shaqyrymǵa deiin qysqarady. Bul kúngi tolyq Ai — jyldyń eń iri jáne eń jaryq Aiy bolmaq, dep habarlaidy Dalanews.kz.
Sýper Ai — Aidyń tolyq fazasy onyń Jerge barynsha jaqyndaý sátimen tuspa-tus kelgen kezde baiqalatyn qubylys. Sol sebepti Ai aspanda ádettegiden 7,9% úlkenirek jáne 16% jaryǵyraq kórinedi.
Astana ýaqytymen tolyq Ai fazasy 5 qarasha kúni 18:20-da bastalady. Al Ai 6 qarasha tańǵy 03:30-da Jerge eń jaqyn qashyqtyqta — 356 832 km jerde bolady. Bul — 2025 jyldaǵy eń az araqashyqtyq, sondyqtan qarashadaǵy sýper Ai astronomiialyq turǵydan eń áserli oqiǵa bolyp sanalady.
Aidy baqylaýdyń eń qolaily ýaqyty — 5 qarasha keshi, aspannyń shyǵys kókjieginde Ai kóterilgen sát. Keiin ol ońtústik baǵytpen ótip, tańǵa qarai batysqa aýysady. Basty shart — ashyq aýa raiy. Aidyń úlkendigi men jaryqtyǵy eń aiqyn baiqalatyn sát — onyń kókjiekten jańa kóterilgen mezgili, óitkeni ol kezde Aidy úilermen, aǵashtarmen salystyryp kórýge bolady.
Biylǵy sýper Aidy astronomdar «Ańshy Ai» dep ataidy. Ádette ol qyrkúiek-qazan ailaryna sáikes keletin bolsa, 2025 jyly bul ataq qarashadaǵy tolyq Aiǵa berilgen. Mundai sáikestik sońǵy ret bes jyl buryn bolǵan jáne 2028 jylǵa deiin qaitalanbaidy.
Jyl saiynǵy 12–13 tolyq Aidyń ishinde 3–4-i ǵana sýper Ai bolyp esepteledi. 2025 jyly eń irileri — 5 qarashadaǵy jáne 5 jeltoqsandaǵy sýper Ailar. Alaida jeltoqsandaǵy Ai qarashadaǵydan sál kishirek bolady, sebebi ol kezde araqashyqtyq 129 km-ge uzarady.
Sýper Ai maýsymy 2026 jyldyń qańtaryna deiin jalǵasady, al sońǵysy — 3 qańtarda baiqalmaq.
Astrologtardyń aitýynsha, sýper Ai kezeńi adamdardyń emotsiialyq kúiin kúsheitip, shabyt pen ómirdi ózgertkisi keletin kóńil-kúi syilaidy. Bul ýaqyt — eski isterdi aiaqtap, jańa bastamalarǵa jol ashýǵa taptyrmas kezeń.
