5 قاراشادا جەر مەن ايدىڭ اراقاشىقتىعى ەڭ از دەڭگەيگە — 356 832 شاقىرىمعا دەيىن قىسقارادى. بۇل كۇنگى تولىق اي — جىلدىڭ ەڭ ءىرى جانە ەڭ جارىق ايى بولماق، دەپ حابارلايدى Dalanews.kz.
سۋپەر اي — ايدىڭ تولىق فازاسى ونىڭ جەرگە بارىنشا جاقىنداۋ ساتىمەن تۇسپا-تۇس كەلگەن كەزدە بايقالاتىن قۇبىلىس. سول سەبەپتى اي اسپاندا ادەتتەگىدەن 7،9% ۇلكەنىرەك جانە 16% جارىعىراق كورىنەدى.
استانا ۋاقىتىمەن تولىق اي فازاسى 5 قاراشا كۇنى 18:20-دا باستالادى. ال اي 6 قاراشا تاڭعى 03:30-دا جەرگە ەڭ جاقىن قاشىقتىقتا — 356 832 كم جەردە بولادى. بۇل — 2025 جىلداعى ەڭ از اراقاشىقتىق، سوندىقتان قاراشاداعى سۋپەر اي استرونوميالىق تۇرعىدان ەڭ اسەرلى وقيعا بولىپ سانالادى.
ايدى باقىلاۋدىڭ ەڭ قولايلى ۋاقىتى — 5 قاراشا كەشى، اسپاننىڭ شىعىس كوكجيەگىندە اي كوتەرىلگەن ءسات. كەيىن ول وڭتۇستىك باعىتپەن ءوتىپ، تاڭعا قاراي باتىسقا اۋىسادى. باستى شارت — اشىق اۋا رايى. ايدىڭ ۇلكەندىگى مەن جارىقتىعى ەڭ ايقىن بايقالاتىن ءسات — ونىڭ كوكجيەكتەن جاڭا كوتەرىلگەن مەزگىلى، ويتكەنى ول كەزدە ايدى ۇيلەرمەن، اعاشتارمەن سالىستىرىپ كورۋگە بولادى.
بيىلعى سۋپەر ايدى استرونومدار «اڭشى اي» دەپ اتايدى. ادەتتە ول قىركۇيەك-قازان ايلارىنا سايكەس كەلەتىن بولسا، 2025 جىلى بۇل اتاق قاراشاداعى تولىق ايعا بەرىلگەن. مۇنداي سايكەستىك سوڭعى رەت بەس جىل بۇرىن بولعان جانە 2028 جىلعا دەيىن قايتالانبايدى.
جىل سايىنعى 12–13 تولىق ايدىڭ ىشىندە 3–4ء-ى عانا سۋپەر اي بولىپ ەسەپتەلەدى. 2025 جىلى ەڭ ىرىلەرى — 5 قاراشاداعى جانە 5 جەلتوقسانداعى سۋپەر ايلار. الايدا جەلتوقسانداعى اي قاراشاداعىدان ءسال كىشىرەك بولادى، سەبەبى ول كەزدە اراقاشىقتىق 129 كم-گە ۇزارادى.
سۋپەر اي ماۋسىمى 2026 جىلدىڭ قاڭتارىنا دەيىن جالعاسادى، ال سوڭعىسى — 3 قاڭتاردا بايقالماق.
استرولوگتاردىڭ ايتۋىنشا، سۋپەر اي كەزەڭى ادامداردىڭ ەموسيالىق كۇيىن كۇشەيتىپ، شابىت پەن ءومىردى وزگەرتكىسى كەلەتىن كوڭىل-كۇي سىيلايدى. بۇل ۋاقىت — ەسكى ىستەردى اياقتاپ، جاڭا باستامالارعا جول اشۋعا تاپتىرماس كەزەڭ.
