20 jastaǵy jaýyngerdiń týystary bul áskeri bólimdegi álimjettiktiń kesiri bolýy múmkin ekenin aityp, kúdiktenýde. Qyzylorda qalasynan byltyr kóktemde ǵana áskerge alynǵan Samrat Tynyshtyqbai jyl ótpei jatyp jyndyhanadan bir-aq shyqty.
Týystary buǵan áskeri bólimdegilerdiń qatysy bar dep topshylaidy. Sebebi, osydan bes kún buryn ǵana aýyldan anasy men ájesi kelgende uly saý bolǵan.
Arada birer kún ótken soń Samrat psihikalyq aýytqýy bar naýqastarǵa arnalǵan aýrýhanadan bir-aq shyqqan.
– Kúdigimiz bar, urǵan bolýy múmkin. Áitpese eki kúnde ol bulai jyndy bolyp qalmaidy ǵoi. Balamyz jyndy adam siiaqty bop qalǵan. Ony qorqytyp-úrkitip, uryp-soǵyp sony bildirmeitin otyrǵan syńaily. Jańa bireý «psihotrop zat salyp jiberýi de múmkin» dedi. Sap-saý balany eki kúnniń ishinde áskeri bólim psihaýrýhanaǵa jatqyzǵan. Ne degen ońbaǵan adamdar! – dep ashyndy sarbazdyń apasy Saltanat Tynyshtyqbai.
– Sarbaz sapta turǵanda ózinen ózi sandyraqtap, sóilei bastady. Ol «sapqa turyńdar» dep aiqailaidy. Arynsha án aitady. Sarbazdardyń sapta turýynyń belgilengen tártip bar. Ol tártipke bári baǵynýy kerek. Jaýynger tártipke baǵynbai, bir teris qylyqtar jasaǵan soń, dárigerler ony tekserýge aldy. Emdeý ortalyǵynyń mamandary sarbazdyń esinde kemistigi bar bolýy múmkin ekenin aitýda. Biraq naqty diagnoz áli qoiylǵan joq, – deidi 35748 áskeri bólimi artilleriia divizionynyń komandiri Ádilet Kenjebekov.
– Sarbaz bizge kelip túskende onyń psihikasy qatty buzylǵany baiqaldy. Qazir naýqas statsionarlyq tekserýden ótýde. Sodan keiin em alýǵa jatqyzylady. Diagnozy áli qoiylǵan joq. Tekserilýde. On kúnniń ishinde diagnoz qoiylady, – didi Shymkent psihikalyq densaýlyq ortalyǵynyń bólim mamany Sýhrab Ábdiqadyrov.
Dárigerler sarbaz emdeý mekemesinde kem degende bir ai jatatynyn aitýda. Al sap-saý ulyn esinen tandyrǵan áskeri bólimdegiler ekenine senimdi jaqyndary áskeri prokýratýradan beinekameralardy jiti zertteýin talap etýde.
