A.Qulsarieva: «Jańa álipbi – paidalanýǵa tiimdi, estetikalyq turǵydan tartymdy»
Apostrof qoldanǵanda eki tańbamen bir áripti belgilep, jazylǵan (basylǵan) sózderdiń uzaryp qana qoimai, tilim-tilim bolyp bólinip qalatyndyǵyn kórgende «latynǵa kóshetin boldyq!» dep órekpigen qýanyshymyz sý sepkendei basqanyn jasyryp qaitemiz. Bul jaiynda áleýmettik jelilerde de, ózara bas qosýlarda da kóp aitylyp júrgenin bárimiz bilemiz.
Tilimizdiń dybystalý ereksheligine sai tym kóbeiip ketetin útirlerge qarap, qýaqylaý áriptester túrli teńeýler tapty. Sóitip«áttegen-ai» dep qysylyp júrgende jańa álipbii bekitilip «ýh!» degendei boldyq.
Aldyńǵy nusqa boiynsha 9 áripti bir terip, qasyna ústińgi útirdi (apostrofty) bir terip, birtutas sózdi julym-julym etkenshe 6 akýtty (noqatty) áripti jáne de jahandyq til – aǵylshynnan úirenshikti bolyp ketken «sh», «ch» áripteriniń qosaq tańbasyn paidalaný áldeqaida tiimdi ári estetikalyq turǵydan alǵanda tartymdy bolǵanyn baiqadyq.
QR Aqparat jáne kommýnikatsiialar ministri Dáýren Abaevtyń pikirinde aitylǵandai, álipbidegi apostrof arnaiy belgi retinde barlyǵyn bólip turyp, internettegi izdeý men qarjy qyzmetinde qiyndyqtar týdyratyndyǵy óz aldyna bir másele.
Áripterdiń ekeýin eseptemegende qalǵan 30-na bir dybys, bir tańba kelip turǵan sońǵy nusqa kópshilik pikiriniń eskerilgendiginiń aiqyn kórinisi retinde de halyqqa jaǵymdy jańalyq shyǵar dep oilaimyn.
Endigi jerde másele sózden iske tezirek kóship, jańa álipbi nusqasynyń tiimdi ómirsheńdigin dáleldeitindei baǵdarlamalar jasap, ony kópshilikke túsindirip, taratý qajet. Jalpy jurt bolyp talqylaǵan álipbi nusqasy bolashaqtyń ásem de qolaily tiltańbasyna ainalyp, kóptiń keregine jaraityna senimdimin.
Aqtolqyn QULSARIEVA, professor, Abai atyndaǵy QazUPÝ-dyń Ǵylymi jumys jáne halyqaralyq yntymaqtastyq jónindegi prorektory
https://dalanews.kz/33351
