"Shevron" kompaniiasy qoldaý kórsetken osynaý is-shara "Taý-Turan" bilim berý-saýyqtyrý kesheninde uiymdastyrylyp baiqaýǵa elimizdiń barlyq óńirlerinen 24 qatysýshy qatysty. Bulardyń ishinde 16 balanyń múgedektigi bar.
Osynaý shara barysynda olar kompiýterlik baǵdarlamalaý, sait ázirleý, menedjment, marketing, internet saýda, robototehnika, mobildi qosymshalar jasaý jáne de jobalar prezentatsiiasyn ázirleý siiaqty jumystardyń qyr-syrymen tanysty.
Shara uiymdastyrýshylarynyń biri, "Erekshe Tańdaý-Shelek" qorynyń prezidenti Zahira Begalievanyń aitýynsha baiqaýǵa qatysýshylarǵa múgedektigi bar adamdardyń ómirin jeńildetetin jobalar usyný mindeti qoiylǵan.
"Bul lagerge tek múmkindigi shekteýli jastardy ǵana emes, sonymen birge aiaq-qoly saý qyz-jigitterdi de shaqyrdyq. Mundaǵy maqsatymyz eki topty biriktirý edi. Osynyń nátijesinde múgedekterge degen kózqarasty ózgertýge tyrystyq. Teńdik. Teń dárejede sóilesý. Múmkindigi shekteýli jastardy qoǵamnan bólekteýge bolmasyn dáleldegemiz keldi.
Lagerge qatysýshy jastar sonymen birge IT tehnologiialar salasyndaǵy, onyń ishinde Microsoft, CISCO, Halyqaralyq IT ýniversiteti mamandarynyń dárisin tyńdaýǵa múmkindik aldy. Spikerler jastarǵa óz jobalaryn qalai jetildirýge bolatynyn aityp, jol kórsetti", – deidi ol.
«Shevron» kompaniiasynyń BAQ-pen bailanys koordinatory Ainur Sydyqovanyń aitýynsha, árbir adam ómirden óz ornyn tabýǵa umtylýy kerek.
– 18 mln adam turatyn Qazaqstanda eki qolǵa bir kúrek tabylady. Abai atamyz, "sen de bir kirpish dúniege, ketigin tap ta bar qalan" dep bekerge aitqan joq. Osydan bir ǵasyrdan astam ýaqyt buryn aitylǵan osy bir ósiet áli kúnge deiin óz ózektiligin joǵaltqan joq. Ómirde óz jolyn tapqan adam maqsatyna jetken adam.
Osynaý lagerde sizderdiń joldaryńyzdy ashsyn. Qorqyp, qobaljymańyzdar. Osy istiń qyr-syryna úirenip, ómirde tabysqa jetýlerińizge tilektespin, – dedi Ainur Sydyqova.
Ainur Sydyqovanyń áriptesi, «Shevron» kompaniiasynyń BAQ-pen bailanys koordinatory Janar Qoshpanovanyń atap ótkenindei, osynaý IT lager múmkindigi shekteýli jastardy qoldaý maqsatynda uiymdastyrylǵan.
"Múmkindigi shekteýli jastar da IT bilimmen, IT tehnologiialarmen sýsyndaýy kerek. Osy salany búge-shigesine deiin meńgerse, keiinnen múgedekterdiń ómir súrýin jeńildetetin zamanaýi jobalar jasap shyǵarary anyq. Múmkindigi shekteýli jastardy eńbekke tartý, qoǵamdyq isterge aralastyrýda osyndai lagerlerdiń mańyzy zor", – dedi ol.
Iá, bul sharanyń mańyzdylyǵy osynda. Shara aiasynda qatysýshylardyń úzdik shyqqan jobalaryna "Shevron" kompaniiasynyń tarapynan grant bólinetin bolady.
Shara uiymdastyrýshylarynyń aityp ótkenindei jobaǵa qatysýshylarǵa IT mamandar tarapynan aqyl-keńes berilip, 3 aidan keiin konkýrsqa qajetti áleýmettik jobalaryn usynalatyn bolady. Keiinnen osy jobany júzege asyrýǵa qarjy-qarajat bólinedi.
Biz óz tarapymyzdan osy sharaǵa qatysqan jastarmen de tildesken edik.
Osy lagerde óziniń I-Dos dep atalatyn jobasyn tanys etken Záitún Qusaiynovanyń aitýynsha lager múmkindigi shekteýli jastardyń ekinshi tynysyn ashyp, jańa jobalar jasaýǵa shabyt berip otyr.
– Men I-Dos dep atalatyn jobanyń jetekshisimin. Meniń jobam IT hakatonda top jardy. Dál qazir 16 qatysýshynyń arasynda baq synaýdamyz. I-Dos jobasy 18-75 jas aralaǵyndaǵy múgedekterge volonterlik kómek kórsetetin qosymsha. Bul joba eriktiler qaýymyn biriktirip, múmkindigi shekteýli jandarǵa qol ushyn sozýǵa baǵyttalǵan.
Naqtyraq aitar bolsam, kómekke muhtaj jan óziniń uialy telefonyna atalǵan qosymshany kóshirip alyp, eriktilerge óziniń ótinishin aita alady. Aitalyq, aýyr jaǵdaiǵa tap bolsa, bul qosymshada SOS túimesi bar. Sonyń negizinde jedel járdemdi nemese volonterlardy kómekke shaqyratyn múmkindigi bar.
Jasyrary joq, kóp jaǵdaida múmkindigi shekteýli jandar úiden shyǵa almaidy. Olardyń qarny ashýy múmkin, dárihanadan dári alý qajettigi týyndaýy múmkin. Mine, sondai kezde bizdiń qosymsha kómekke keledi, – deidi ol.
Taǵy bir joba qatysýshysy Temirhan Izbasqanov múgedekterge arnalǵan internet-kafe ashqysy keletinin aitty.
- Aqtóbe qalasynda mundai oryndar múlde joq. Bar bolǵan kúnniń ózinde múmkindigi shekteýli azamattyń qaltasyna aýyr soǵýy múmkin. Men qolǵa alǵaly otyrǵan internet - kafe múgedek azamattar úshin tegin bolady. Olar osy kafege kelip, internetke kirip, ózara pikiralmasady, – deidi ol.
Aita ketelik, jobanyń kelesi kezeńinde eń úzdik toptarǵa áleýmettik másele sheshýge baǵyttalǵan IT usynystaryn júzege asyrýǵa (jalpy sommasy 2 000 000 teńge) granttar beriledi. Múmkindikteri shekteýli adamdardyń jumysqa ornalasýǵa básekelestigin joǵarylatatyn jobalarǵa erekshe nazar aýdarylady.
Joba «Erekshe Tańdaý-Shelek» Korporativtik qory, «Moiymaityn Múgedekter Qoǵamy» Qoǵamdyq birlestigi, «Samruk-Kazyna Trust» áleýmettik jobalardy damytý qorynyń birlestigi men «Shevron» kompaniiasy, QR Eńbek jáne halyqty áleýmettik qorǵaý ministrligi jáne «Ortalyq Aziianyń Evraziia Qory» Korporativtik qorynyń qoldaýymen júzege asyp jatyr.
