Qazaqstan delegasıasynyń quramynda oblys ákimdiginiń, İ.Jansúgirov atyndaǵy Jetisý memlekettik ýnıversıtetiniń, «Almaty oblysyn damytý boıynsha «Alataý» AQ, oblystyń kásipkerlik uıymdary ókilderi jáne «Jetisý» ÁKK» ulttyq kompanıasynyń basshylyǵy da bar.
Sapar kantonmen saýda-ekonomıkalyq, qarjy jáne ǵylymı-tehnıkalyq yntymaqtastyq ornatýdy, Qazaqstandaǵy bıznes júrgizýdiń jeńildetilgen sharttarymen tanystyrýdy, sondaı-aq, keleshek yntymaqtastyqty keńeıtý men jańa salalardy birlesip tabýdy maqsat etti.
Qazaqstannyń Shveısarıadaǵy Elshiliginiń habarlaýynsha, Almaty oblysynyń ákimi A.Batalovtyń Tıchıno kantonynyń Prezıdenti Manýele Bertolımen, Memlekettik kansler Arnoldo Kodýrımen, Ekonomıka jáne qarjy mınıstri Krıstıan Vıttamen, Lýgano qalasynyń ákimi Marko Borradorımen, Tıchıno kantony bankiniń Dırektorlar keńesiniń tóraǵasy Fabrısıo Chıslakvıchpen, Qoldanbaly ǵylym men óner ońtústik Shveısarıanyń Ýnıversıtetiniń (SUPSI) Inovasıa men zertteý departamentiniń orynbasary Janbatısto Ravanomen jáne 20-dan astam shveısarıalyq kompanıalar basshylarymen kezdesýleri ótti. Almaty oblysy delegasıasynyń músheleri Tıchıno kantonyndaǵy qoqysty qaıta óńdeý boıynsha eń iri kásiporyn «Azienda Cantonale die Rifiuti», shokolad óndiretin «Chocolat Stella», energetıka jáne aqparattyq tehnologıalar boıynsha «AVV» kompanıalarymen, sondaı-aq Aırolo qalasynda taý shańǵysy kýrorty, asyl tuqymdy sıyr sharýashylyǵy jáne irimshik pen sút ónimderin shyǵaratyn zaýyttardyń jumysymen tanysty.
«Azienda Cantonale die Rifiuti» - Tıchıno kantonynyń qaldyqtardy tereń óńdeıtin eń iri zaýyty, táýligine 100 tonna qaldyqty óńdep, 10 MVt energıa men 2 MVt-tan astam jylý qýatyn óndiretinin atap ótý qajet.
Tıchıno kantony basshylyǵymen kelissózder barysynda saýda-ekonomıkalyq, bilim, ǵylym, týrızm, aýyl sharýashylyǵy jáne qarjy máselelerinde yntymaqtastyqty nyǵaıtý jaıy talqylandy. Kantonnyń Prezıdenti Manýele Bertolı Almaty oblysy men Tıchıno kantonynyń ekijaqty yntymaqtastyq úshin úlken áleýeti bar ekendigine jáne bul sapar onyń is júzinde júzege asyrylýyna yqpal etetinine erekshe kóńil aýdardy.
Qazaqstannyń Dúnıejúzilik Saýda Uıymynyń jáne Eýrazıalyq Ekonomıkalyq Odaǵynyń múshesi bolýyna tıimdiligi, elimizdegi keń ınvestısıalyq preferensıalar jáne bıznes júrgizý úshin jeńildetilgen sharttary Shveısarıa isker toptarynyń arasynda erekshe qyzyǵýshylyq týdyrdy.
Ótkizilgen kezdesýlerdiń nátıjesinde taraptar Almaty oblysyndaǵy ınvestısıalyq jobalardy júzege asyrý múmkindigin zertteýge, tájirıbe almasýǵa, ásirese Ońtústik Shveısarıanyń qoldanbaly ǵylymdar jáne óner ýnıversıtetimen (SUPSI) bilim jáne ǵylym salasynda yntymaqtastyqty nyǵaıtýǵa qol jetkizdi. Qazaqstan tarapy Kanton basshylyǵymen jergilikti isker toptaryn Almaty oblysyna issaparmen kelýge shaqyrdy.
Tıchıno kantony - Shveısarıanyń iri qarjy ortalyqtarynyń biri, sondaı-aq munda aqparattyq-kommýnıkasıalyq tehnologıalar, bilim, týrızm, qurylys, máshına jabdyqtary, farmasevtıka men bıomedısına salalary damyǵan. JİÓ 28,6 mlrd. AQSH doll., halyqtyń jan basyna shaqqanda JİÓ 82,1 myń AQSH doll., al Shveısarıanyń JİÓ-ge úlesi 4,5% quraıdy.
Almaty oblysy ákimdiginiń baspasó qyzmeti
