Búginde sandyq tehnologıalardy ıgerýdiń birden-bir basty quraly – kompúterlik tehnıka. Almaty oblysynda ótken oqý jylynda oblys boıynsha orta eseppen 1 kompúterge 5 oqýshydan kelse, osy oqý jylynda taǵy 665 dana kompúterlik tehnıka satyp alýǵa 245,9 mln teńge bólindi. Bul týraly Almaty oblysynyń ortalyǵy Qonaev qalasynda ótken muǵalimderdiń tamyz keńesinde oblys basshysy Marat Sultanǵazıev málimdedi, – dep habarlaıdy Dalanews.kz.
Jergilikti búdjetten 2022 jyly – 99,0 mln., 2023 jyly 2,1 mlrd teńgege 236 jańa modıfıkasıaly pán kabınetteri satyp alyndy.
Al, aǵymdaǵy jyly «Qazaqstan halqyna» qory tarapynan 1,5 mlrd. teńgege 50 mekteptiń fızıka, hımıa, bıologıa kabınetteri jáne aýdan ortalyǵynda ornalasqan 3 aýyldyq mekteptiń oqý kabınetteri 100% jabdyqtaldy.
– Balalar – elimizdiń bolashaǵy, ómirimizdiń jalǵasy. Biz, eresekter, olardyń tolyqqandy jabdyqtalǵan mektepterde bilim alýymen qatar, olardy qorǵap, qaýipsizdigin qamtamasyz etýge mindettimiz.
Bilim alýshylardyń qaýipsizdigin qamtamasyz etýge 2024 jyly 525,1 mln teńge bólindi. Onyń ishinde 253,1 mln teńge – bilim berý mekemelerin lısenzıalanǵan kúzetke qosýǵa, 188,0 mln. teńge – beınekameralardy jańartýǵa, 84,0 mln teńge – mekemelerdi jedel basqarý ortalyǵyna (SOÝ) qosýǵa qarastyryldy.
Sondaı-aq, bıylǵy jylǵy jaqsy jańalyq - oblys boıynsha balalar men jasóspirimder arasyndaǵy psıhologıalyq jaǵdaıdy turaqtandyrý maqsatynda psıhologıalyq qoldaý ortalyǵy ashylyp, jumysyn bastady. Bilim alýshylardyń qaýipsiz ortada jan-jaqty jáne tereń bilim alýy baǵytyndaǵy jumystarymyz aldaǵy ýaqytta da jalǵasady, – dedi Marat Sultanǵazıev keńeste sóılegen sózinde.
Jıynda ózekti problemalardyń biri – úsh aýysymdy oqytý men oqýshy oryndarynyń tapshylyǵy máselesi de qaraldy. 2023-2025 jyldar aralyǵynda óńirde «Jaıly mektep» ulttyq jobasy aıasynda 53 mektep salý josparlanypty.
– Biz mektepter salýda jeke ınvestorlardy da tartyp otyrmyz. Búginde oblysymyzda ınvestorlyq joba boıynsha 4 mektep salynýda. Esik qalasynda jeke ınvestor Bolat Ótemuratovtyń qory 900 oryndyq 2 mektep qurylysyn birer kúnde aıaqtaıdy jáne memleketke syıǵa tartatyn bolady, –dedi óńir basshysy.
Bul mektepter turǵyndar eń kóp shoǵyrlanǵan Eńbekshiqazaq aýdanynyń úshaýysymdy mektepteri problemasyn sheshetini de jetkizdi.
