Aldaǵy qyrkúiekte Astanada ótetin 5-shi Dúniejúzilik kóshpendiler oiyndary qarsańynda qazaqstandyq kókparshylar Almaty oblysynda kókpar jáne kókbóri oiyndary boiynsha oqý-jattyǵý jiyndaryn ótkizip jatyr, – dep habarlaidy Dalanews.kz Ulttyq sport qaýymdastyǵynyń qyzmetine silteme jasap.
– DKO aiasynda kókpar jáne kókbóri oiyndary ótedi. Qazir sportshylardyń daiyndyqtary jaqsy. Basty qarsylas retinde Qyrǵyzstan men Ózbekstandy aitar edim. Eger biz kókpardan jeńisimizge senimdi bolsaq, kókbóri oiynynan múmkindikterimiz teń dárejede. Biraz jyldan beri kókbóri oinaǵan joqpyz. Dese de jeńis úshin barlyq múmkindigimizdi paidalanamyz, – dedi kókpardan Ulttyq quramanyń bas bapkeri Aqylbai Mankeev.
Kókpardan ulttyq qurama múshesi Naýryzbai Qaltaev bairaqty básekege daiyndyq jaily jáne kókpar men kókbóriniń aiyyrmashylyqtary týrasynda aityp berdi.
– 5-shi Dúniejúzilik kóshpendiler oiyndaryna degen daiyndyǵymyz joǵary deńgeide ótip jatyr. Eki sporttyń aiyrmashylyǵy taim sanynda – kókbóride úsh taim oinalady, al kókparda ekeý. Kókbóride qazandyqqa, al kókpar jerge syzylǵan sheńberde oinalady, – dep atap ótti Naýryzbai Qaltaev.
Kókbóri saiysy boiynsha ár komandadan 12 qatysýshy bolady. Sportshylardyń daiyndyǵy úshin Kókpar federatsiiasy tájirbieli keńesshilerdi tartqan. Oqý-jattyǵý jiyndary QR Týrizm jáne sport ministrliginiń Ulttyq jáne at sporty túrleri ortalyǵynyń qoldaýymen uiymdastyrylyp otyr.
Eske sala keteiik, Respýblikalyq «Kókpar» federatsiiasy Qazaqstan Respýblikasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Aýdaryspaq», «Báige», «Teńge ilý», «Sadaq atý», «Jamby atý», «Qusbegilik», «Asyq atý», «JORYQ» at sporty jáne t.b. federatsiialar bar. QR Ulttyq sport qaýymdastyǵyn Islambek Saljanov basqarady.
Aita keterligi, 8-13 qyrkúiekte Astana qalasynda 5-shi Dúniejúzilik kóshpendiler oiyndary ótedi. Is-sharaǵa 89 elden 2000-nan astam sportshy qatysady dep josparlanýda. 5-shi Dúniejúzilik kóshpendiler oiyndarynyń Bas demeýshisi – ALAGEUM ELECTRIC, Oiyndardyń Bas seriktesi – Halyk Bank. Astanada ótetin Dúniejúzilik kóshpendiler oiyndarynda barlyǵy 21 sport túrinen 97 medal jiyntyǵy sarapqa salynady.
