Almaty oblysynyń Jambyl aýdanyndaǵy Qarǵaly aýylynda birneshe adam jetim oqýshy qyzdy zorlaǵan, dep habarlaıdy Dalanews.kz.
Onymen qoımaı olar qyz balany zorlaǵanyn vıdeoǵa túsirip, ınternetke taratyp jibergen. Ata-analardyń sózinshe, bul oqıǵany ótken aptadan beri jaýyp tastamaq bolǵan.
Jambyl aýdanynyń bilim bólimi bul jaıtqa qatysty pikir bildirdi. Vedomstvo málimetinshe, mektep dırektory kámeletke tolmaǵandardyń qatysýymen bolǵan oqıǵa týraly derekti dereý habarlaǵan.
Qazirgi ýaqytta Qarǵaly aýylynda orta mektep oqýshylarynyń qatysýymen bolǵan oqıǵa boıynsha tergeý júrgizilip jatyr.
Jambyl aýdanynyń bilim bólimi taratqan aqparatqa sáıkes, mektep dırektory 2025 jyldyń 13 qazanynda 2025 jyldyń 21 qyrkúıeginde, jeksenbi kúni, sabaq ýaqyty men mektep aýmaǵynan tys, jeke úıde kámeletke tolmaǵandardyń qatysýymen oqıǵa bolǵanyn bilgen. Bul týraly habardar bolǵan soń, dırektor dereý quqyq qorǵaý organdaryna aqparat bergen.
Atalǵan derek boıynsha tergeý organdary QR Qylmystyq kodeksiniń 124-babynyń 1-bóligi boıynsha qylmystyq is qozǵady. Qazir oqıǵanyń barlyq mán-jaıyn anyqtaýǵa baǵyttalǵan qajetti tergeý amaldary júrgizilip jatyr.
Oqýshylarmen jeke profılaktıkalyq jáne túsindirý jumystary atqarylýda. Oblystyq psıhologıalyq qoldaý ortalyǵynyń mamandary zardap shekken jasóspirimge kómek kórsetip jatyr.
"Mektep dırektory durys áreket etti, ol polısıaǵa dereý habarlaýǵa mindetti bolatyn. Qazir tergeý organdary qylmystyq is qozǵady, barlyq derek anyqtalady. Degenmen, biz qoǵamdy jalǵan aqparat taratpaýǵa jáne balalarǵa qatysty taqyryptardy haıpqa aınaldyrmaýǵa shaqyramyz. Balanyń taǵdyry men jaǵdaıy bárinen mańyzdy", – dedi Jambyl aýdanynyń bilim bólimi basshysy Svetlana Altynbekova.
Aıta ketý kerek, QR Qylmystyq-prosestik kodeksiniń 201-babyna sáıkes, prokýrordyń ruqsatynsyz sotqa deıingi tergeý derekterin jarıa etýge tyıym salynady. Al QR Qylmystyq kodeksiniń 423-baby mundaı buzýshylyq úshin qylmystyq jaýapkershilikti qarastyrady. Sonymen qatar, Qylmystyq kodekstiń 274-babynda qoǵamdyq tártipti buzý nemese eleýli zıan keltirý qaýpin týdyratyn jalǵan aqparat taratqandarǵa jaýapkershilik kózdelgen.
