Aqmola oblysy boiynsha Qarjylyq monitoring agenttigi departamenti prokýratýranyń úilestirýimen S-Group qarjy piramidasynyń Kókshetaýdaǵy bólimshesi basshylaryna qatysty tergeýdi aiaqtady, dep habarlaidy Dalanews.kz.
Tergeý dereginshe, uiymdastyrýshylar "S-Pharmaceutical" kompaniiasy arqyly meditsinalyq kannabis óndirý jáne taratý jobasyna investitsiia salý syltaýymen azamattardy tartqan. Olar árbir jańa qatysýshyny shaqyrǵan adamǵa salym somasynyń 5 paiyz mólsherinde tabys ýáde etken. Jobaǵa qatysý úshin sait arqyly tirkelip, 100 dollardan bastap jarna engizý talap etilgen.
Agenttik málimetinshe, kúdiktilerdiń biri buryn "Life Is Good" jáne "Finiko" qarjy piramidalarynyń qatysýshysy bolǵan. Ol sol jobalardan tabys taýyp, keiin uqsas shemany paidalanyp óz jobasyn qurýǵa sheshim qabyldaǵan.
Nátijesinde qarjy piramidasyna 59 azamat tartylyp, olar jalpy somasy 136 million teńgeden astam qarajat salǵan.
"Kúdiktiler jinalǵan aqshany paidalanyp, elordadan eki páter men turaq ornyn satyp alǵan. Sot sanktsiiasymen bul múlikke qamaý sharasy qoldanyldy", – delingen agenttik habarlamasynda.
Úsh uiymdastyrýshyǵa qatysty elden shyǵýǵa tyiym salynyp, qolhatpen bosatý túrindegi bultartpaý sharasy tańdaldy.
Agenttik ókilderi istiń basqa derekteri QR Qylmystyq-protsestik kodeksiniń 201-babyna sáikes jariialaýǵa jatpaitynyn atap ótti.
