Qyz alyp qashýǵa qatysty alǵashqy eki qylmystyq is qozǵaldy, dep habarlaidy Dalanews.kz.
2025 jylǵy 16 shildede Memleket basshysy qylmystyq zańnamany ońtailandyrý máseleleri jónindegi Zańǵa qol qoidy.
Atap aitqanda, azamattardyń qaýipsizdigin qamtamasyz etý sharalaryn kúsheitý, sonyń ishinde jeke ómirge qol suǵatyn, biraq kúsh qoldanýsyz jasalatyn quqyqqa qarsy áreketterdiń asa aýyr qylmystarǵa ulasýyn boldyrmaý maqsatynda Qylmystyq kodekske stalking úshin qylmystyq jaýaptylyq engizildi (QK-tiń jańa 115-1-baby).
Stalking - zorlyq-zombylyqpen bailanysty emes adamnyń zańsyz qýdalanýy retinde aiqyndalǵan. Mundai árekette zorlyq belgileri bolmaǵandyqtan stalking qylmystyq teris qylyqtar sanatyna jatqyzyldy.
Bul baptyń maqsaty - fizikalyq kúsh qoldanýǵa nemese ashyq qaýip-qaterge barmaǵan qýdalaýshylardan yqtimaly joǵary qurbandardy qorǵaý.
Qoldanyqsa engizilgennen bastap (16.09.2025j. bastap) elimizde stalking faktileri boiynsha 2 qylmystyq is tirkeldi (Atyraý jáne Pavlodar oblystarynda).
Aita ketý kerek, stalking jasaǵan adamdarǵa 200 AEK-ke deiin aiyppul salý, ne sol mólsherde túzeý jumystaryna, ne 200 saǵatqa deiingi merzimge qoǵamdyq jumystarǵa tartý, ne 50 táýlikke deiin qamaýǵa alý túrindegi jaza kózdelgen.
Sondai-aq áielderdiń quqyqtaryn qorǵaýdy kúsheitý sharalary aiasynda osy Zańmen neke qiiýǵa májbúrleý úshin de qylmystyq jaýaptylyq engizildi (QK-tiń jańa 125-1-baby).
Eger áiel adam urlanyp, kúsh qoldaný qaýpimen nemese múlkin joiý ne búldirý qaterimen neke qiiýǵa májbúrlense, kináli adamǵa 2000 AEK-ke deiin aiyppul salý, ne dál sol mólsherde túzeý jumystaryna tartý, ne 2 jylǵa deiingi merzimge bostandyǵyn shekteý, ne sol merzimge bas bostandyǵynan aiyrý túrindegi jaza kózdelgen.
Abaisyzda aýyr zardaptar týyndaǵan jaǵdaida - kináli adam 5 jyldan 10 jylǵa deiin bas bostandyǵynan aiyrý jazasyna tartylady.
Neke qiiýǵa májbúrleý faktileri boiynsha alǵashqy qylmystyq ister Shymkent qalasynda, Qyzylorda, Aqtóbe jáne Mańǵystaý oblystarynda tirkeldi.
Aita keterligi, eki jaǵdaida jábirlenýshiler kámeletke tolmaǵandar bolǵan.
Atalǵan faktiler boiynsha tergeý jalǵasýda jáne prokýratýra organdarynyń baqylaýynda tur.
