Osynaý qýanyshty sátti uzaq kútken jastardyń kezekti legi bastapqy jarnasy nebári 10 paiyzdy jinap, «Otbasy bankinen» 5 paiyzdyq mólsherlememen (JTSM 5,2% bastap) zaem alý arqyly baspanaly boldy.
Olardyń deni ekinshi naryqtaǵy úidi tańdaǵan. Otbasy bank basshylyǵy qatarynda dárigerler, muǵalimder, balabaqsha tárbieshileri, sýretshiler, sportshylar, qutqarýshylar, órt sóndirýshiler, jýrnalister jáne áleýmettik sala qyzmetkerleri bar. Úili bolǵan jas mamandarǵa quttyqtaý gramotalary tabys etildi.
Almatydaǵy «Otbasy bank» filialynyń direktory Danagúl Túsipovanyń aitýynsha, «Almaty jastary» baǵdarlamasy iske qosylǵan 2017 jyly júz adam ǵana zaem alsa, keiingi jyldary aýqymy keńeiip, biyldyń ózinde 1100 azamat óz baspanasyna ie bolmaq.
– Biyl baǵdarlamaǵa 20 mlrd teńge bólindi. Onyń 17 mlrd ákimshilik, 3 mlrd «Otbasy bank» tarapynan berildi. Buryn baiqaýǵa qatysýshylarǵa Almaty qalasynda tirkeýde turý mindettelse, qazir bul talap alynyp tastalynǵan. Jastardyń qaladaǵy mekemede jumys istegenine kem degende 6 ai bolsa bolǵany. Sondai-aq, qatysýshylardyń jasy 35-ten (qosa alǵanda) aspaýy tiis, – dedi Danagúl Túsipova.
– Sátbaev ýniversitetiniń oqytýshysy jáne ǵylymi qyzmetkerimin. Osyǵan deiin úi jaldap keldim. Jumys ótilim jetkiliksiz boldy. Biyl baspana buiyrǵanyna qýanyshtymyn. Sebebi, bul baǵdarlama biz siiaqty jas otbasy úshin óte tiimdi. 5 paiyzben beriledi. Ai saiynǵy tólemaqysy az shyǵady, – deidi úili bolǵan Sholpan Islam.
Sondai-aq, «Otbasy bank» filialynyń direktory Danagúl Túsipova qazaqstandyqtardyń baspana satyp alýyna jergilikti bilik qana emes, jeke kompaniialar, zaýyttar, kásiporyndar, meditsinalyq ortalyqtar da kómektese alatynyn qaperge salyp, bank ónimderin tanystyra ketti.
– 2019 jyly iske qosylyp, suranysqa ie bolǵan «Korporativtik» ónim aiasynda kompaniialar óz qyzmetkerlerin nesielendirý úshin aqsha bóledi. Osy joba aiasynda qazirdiń ózinde 600 qazaqstandyq otbasy baspana máselesin sheship úlgerdi. Qyzmetkerlerdiń turǵyn úi jaǵdaiyn jaqsartýǵa jumsalǵan jalpy somasy 10 mlrd teńgeden asty, – dep atap ótti Túsipova.
Naqtyraq aita ketsek, «Korporativtik» ónim – bul elimizdiń barlyq aimaǵyndaǵy jekelegen kompaniialardyń kez kelgen jaǵdailary men sharttaryna beiimdelýge múmkindik beretin ámbebap qural.
Ár kásiporyn óz qyzmetkerlerine turǵyn úi satyp alý úshin qarjylandyrý sharttarynyń ózindik nusqasyn qurai alady. Mysaly, bank kompaniiadan paiyzben qarajat ala alady nemese kompaniia ol aqshany qyzmetkerlerine zaem berý úshin bastapqy jarna retinde depozitke sala alady.
Tipti, bul qarjyǵa bankten obligatsiialar satyp ala alady. Iaǵni, jumys berýshi uiymnyń qarjylandyrý tásilderiniń kóptegen joly bar. Olardy paidalana otyryp, bank kásiporyn qyzmetkerlerine jeńildetilgen paiyzben nesie berý úshin, bos qarajatyn ýaqytsha bankke berý arqyly óz mamandaryna kómektesedi.
Bul rette kompaniia qyzmetkerleri alǵashqy jáne ekinshi naryqtan turǵyn úi satyp alý úshin 5% (JTSM 5,2%-dan bastap) mólsherlemesi boiynsha, keiinnen ol 3,5%-ǵa (JTSM 3,6%-dan bastap) deiin tómendeitin ipoteka rásimdei alady. Iaǵni, artyq tólemsiz, merziminen buryn óteý múmkindigimen nesie ala alady. Zaem 19 jylǵa deiingi merzimge quny 50 mln teńgege deiin beriledi.
Al «Korporativtik» ónimniń taǵy bir artyqshylyǵy – bastapqy jarnanyń mólsheri. Ol Otbasy bank pen kompaniia arasyndaǵy yntymaqtastyq sharttaryna bailanysty turǵyn úi qunynyń 0% -10% bolýy múmkin. Demek, «Korporativtik» ónimdi paidalana otyryp, kompaniialar kásibi kadrlar pýlyn qalyptastyryp, olarǵa áleýmettik jaǵdaiyn durystaýǵa jaǵdai jasaidy.
Sondai-aq, Otbasy bank qyzmetkerleri «Armanǵa jol» seriktestik baǵdarlamasy týraly da keńirek maǵlumat berdi. Bul qural kásiporyn qyzmetkerlerine jalaqysynan Otbasy bankindegi depozitke aqshany avtomatty túrde aýdarý arqyly baspanaǵa qarajat jinaýǵa kómektesedi. Osy mindetti ózine alǵan mekeme esepshisi árbir aýdarym úshin 1 myń teńge tabys tabýyna bolady.
Biznesti damytý basqarmasynyń joba menedjeri Gúlderai Imanqulova jalpyǵa ortaq baspana alý sharttaryn atap ótti. Mamannyń aitýynsha, ol úshin úsh talap oryndalýy kerek. «Birinshi, depozitke kemi úsh jyl tolý qajet, ekinshi – baspana qunynyń 50 paiyzyn jinaý kerek, úshinshi – baǵalaý kórsetkishi eń az degende 16 bolý kerek. Osy talaptar oryndasa, tabysty rastamai-aq baspanany 3,5-5 paiyz (JTSM 3,6% bastap) arasynda alady», – degendi eskerte ketti.
