Qazaqstandaǵy tuńǵysh tehnıkalyq zertteý ýnıversıteti – Sátbaev ýnıversıtetiniń 90 jyldyǵyna jáne qazaqtyń uly ǵalymy Qanysh Sátbaevtyń 125 jyldyǵyna arnalǵan saltanatty is-shara barysynda Allur qazaqstandyq avtomobıl kompanıasynyń ǵylymı-zertteý jobalarynyń jetekshisi Aıgúl Ahmetova ǵylym men bilimdi damytýǵa qosqan úlesi úshin Sátbaev atyndaǵy medalmen marapattaldy, dep habarlaıdy Dalanews.kz.
Bul marapat ýnıversıtettiń strategıalyq seriktesterine tabystaldy. Olar tek eldiń ónerkásibin damytyp qana qoımaı, bolashaq mamandardy daıarlaýǵa belsendi atsalysýda.
“Bul marapat – adam kapıtalyn damytý jolyndaǵy ortaq eńbegimizdiń nátıjesi. Sonymen qatar bilim berý uıymdarymen sapaly yntymaqtastyq ornatqan Allur joǵary ınjenerlik mektebiniń úsh jyldyq jumysynyń jemisi. Atalǵan qurylymnyń naqty nátıje kórsetip jatqanyna qýanyshtymyz. Bul tásil ınjenerlik-tehnıkalyq kadrlardy daıarlaýdyń ulttyq úlgisiniń negizi bolmaq”, — dep atap ótti Aıgúl Saparǵalıqyzy.
Allur — kadrlardy zamanaýı jergilikti qajettilikter úshin ǵana emes, bolashaq ınovasıalyq ekonomıkaǵa da beıimdep daıarlaıtyn tutas model qurýǵa umtylǵan alǵashqy qazaqstandyq kompanıalardyń biri. Kompanıanyń ınjenerlerdi úsh baǵyt boıynsha daıarlaýdy kózdeıdi. Atap aıtatyn bolsaq, ǵylym ınjeneri, óndiris ınjeneri jáne kásipker ınjener. Bul model bilim berýdiń mektep deńgeıinen bastap qoldanbaly ǵylymǵa deıingi barlyq kezeńin qamtıdy.
Búginde kompanıanyń birqatar jetistigi bar:
— stýdentterdiń teorıalyq bilimin praktıkalyq daǵdylarmen ushtastyrýǵa múmkindik beretin dýaldy bilim berý júıesin engizý;
— stýdentterdiń dıplomdyq jobalaryn naqty óndiristegi tájirıbege súıene otyryp ázirleý.
Sonymen qatar Aıgúl Ahmetova bilim berý salasynyń jahandyq kóshbasshylarymen ıntegrasıa jasaý jańa serpin beretinin aıta otyryp, Allur kompanıasy halyqaralyq tájirıbeni belsendi túrde tartatynyn atap ótti. Búginde kompanıa Qazaqstanda koreı ýnıversıtetteriniń fılıaldaryn ashý boıynsha jumys istep jatyr. Mundaı fılıaldardyń biri Qostanaı oblysynda Ahmet Baıtursynuly atyndaǵy Qostanaı óńirlik ýnıversıteti bazasynda ekinshi jyl jumys istese, endi Rýdnyı ındýstrıalyq ınstıtýty bazasynda fılıal ashý josparlanýda.
Bul bastamalar óńirdiń bilim berý áleýetin nyǵaıtyp, jańa óndiristik revolúsıa jaǵdaıynda jumys isteı alatyn bilikti mamandardy daıyndaýǵa berik negiz qalyptastyrady.
Prezıdent Qazaqstan halqyna arnaǵan joldaýynda 2025 jyldy “Jumysshy mamandyqtary jyly” dep jarıalady. Bul Allur kompanıasynyń negizgi maqsattarynyń birine sáıkes keledi. Naqtyraq aıtsaq, biz de el ekonomıkasynyń suranysyna saı keletin ári Qazaqstannyń bolashaǵyn aıqyndaıtyn kadrlardy daıyndaýǵa jumys isteımiz.
“Álem jańa tehnologıalarǵa bet buryp keledi, al eldiń bolashaǵy bilikti ınjenerlerge baılanysty. Sondyqtan Allur biregeı ulttyq úlgini damyta otyryp, bilim berý qurylymdarymen ıntegrasıany jalǵastyrady”, — deıdi Allur kompanıasy dırektorlar keńesi tóraǵasynyń keńesshisi.
Allur kompanıasynyń ǵylym men bilimdi damytýǵa qosqan úlesi eldegi jetekshi ýnıversıtetterdiń biri Satbayev University-diń mereıtoıynda atalyp ótýi — bul ónerkásip, bilim jáne ınovasıa arasyndaǵy baılanysty nyǵaıtýdaǵy mańyzdy jumystyń nátıjesi. Sonymen qatar bul el damýynyń jańa baǵytyn aıqyndaýǵa múmkindik beredi.
