[caption id="attachment_18667" align="alignright" width="428"]
Aýylda iesiz qalǵan qulazyǵan úi. Sylaǵy túsip, keteýi kete bastaǵan. Bir kezdergi máýeli baý-baqshasy men bala-shaǵanyń ý-shýy arylmaityn aýlasyn aram shóp basyp ketken. Qora-qopsyǵynda kezbe kesirtki men qaraǵashtyń butaǵyna qonǵan qara qarǵadan basqa tirlik iesi kórinbeidi. Úidiń esiginde qulyp tur...
Bul – Qýanysh aýylynda (Zaisan) áke-shesheme arnap, men salǵan úi. Ózimnen keiingi on bir baýyr-qaryndasym osynda ósti. Úidi ózim salsam da, munda men qonaq retinde ǵana keletin edim. (Mektepti naǵashylarymnyń qolynda Qarabulaq aýylynda bitirdim; odan soń Zaisanda aýdandyq gazette istedim; odan keiin úsh jyl teńiz áskerine kettim; áskerden kele sala – bes jyl ýniverstitet; bes jyl Óskemendegi jeke turmys; keiinnen otbasymmen Almatyǵa qonys aýdardym...).
Qazaqtar – «qara shańyraq», orystar – «otchii dom» deidi. Sol úiimniń endigi kespiri – osy. Inimiz ekeýimiz eki jyl júrip, ár kirpishin óz qolymyzben samannan quiyp salǵan úiimniń keteýsiz keipi ishi-baýyrymdy ezip jibergendei boldy. Eriksiz kózime jas alyp, óńeshime keptelgen óksikti juta almai uzaq turdym. Qasyma ergen Erǵabit dosym da: «Eh, zaman-ai!...» dep, bir kemseńdep aldy...
Budan 26 jyl buryn anam ekken kópjyldyq gúl (sýretti ashyp qarańyz) ǵana sarǵaiǵan saǵynyshtyń reńindei bop, jaiqalyp tur. Qorǵannan attap barýǵa dátim barmady: múlgigen tynyshtyq pen shirek ǵasyr burynǵy estelikti úrkitip almaiyn dedim.
Endi kimge, nege nalimyn? (Aitpaqshy, Almatyda jatyp, ien qalǵan úiim esime túsken saiyn, qara shańyraqty tastap ketken inimdi talai ret qamshylap aldym. Odan qaiyr qaisy? Ol baiǵus ta (?) jumyssyzdyqtan sendelip, ien qalǵan aýyldadaǵy itshilegen tirlikten qalaǵa qashýǵa májbúr bolǵanyn bile tursam da, menen talai-talai sóz estip júr. Osydan Almatyǵa bara salyp, ony otbasymen keri kóshirgim keledi. Biraq Alla da, Aqorda da ádiram qaldyrǵan bul aýyldan ol ne izdeidi?).
Bunyń bárin nege jipke tizgendei aityp otyrmyn?
Aitatyn sebebim – Qýanysh aýylynda mundai ien qalǵan úiler tutas kóshe-kóshe bop, qańyrap tur. Kezinde ortalyq bolǵan bizdiń kóshede júzge tarta úidiń onǵa tolar-tolmasynda ǵana tirshilik qalǵan. Bul aýylda bir kezderi 40 myń qoi baqqan keńshardyń halqy turdy degenge dátiń barmaidy. Bir jyldary bir-bir kolhozdyń ortalyǵy bolǵan mańaidaǵy Kókjyra, Birjan, Aqaral aýyldaryndaǵy jaǵdai da osynyń arjaq-berjaǵy: údere kóshken el, kúizelgen aýyl, qańyraǵan úiler.
...Oralhannyń keńes kezinen qalǵan kók traktory tar-tar otala jónelmegende, Qýanyshta tirshilik toqtap qalǵandai eken. Men ańyraǵan aýyldan ano-o-ý-ý jyldarǵy arqa-jarqa aǵaiyndarymdy taba almai, Zaisandaǵy qonaq úige túneýge qaittym. Jol boiy jyladym-ai kep-kep-kep...
Avtordyń Feisbýktegi paraqshasynan alyndy
