Óńirler bólinisinde ótinishterdiń eń kóp sany Túrkistan oblysynda – 20,3 myń otbasy, Shymkent qalasynda – 14,5 myń otbasy, Almaty oblysynda – 9,9 myń otbasy, Jambyl oblysynda – 8,2 myń otbasy, Qyzylorda oblysynda – 7,4 myń otbasy qabyldandy.
Óńirlerde 2,6 myńnan astam ýchaskelik komissiia jumys isteidi. Olar júrgizgen zertteý nátijelerin eskere otyryp, AÁK 46,8 myń otbasyǵa nemese 236,5 myń adamǵa taǵaiyndaldy. AÁK taǵaiyndaýǵa ótinish bergen otbasylardyń materialdyq jaǵdaiyn tekserý jumystary jalǵasýda.
Óńirler bólinisinde eń kóp taǵaiyndaý sany Almaty oblysyna – 6617 otbasy, Shymkent qalasyna – 5992 otbasy, Jambyl oblysyna – 5427 otbasy, ShQO – 4437 otbasydan keledi.
Budan buryn habarlanǵandai, Memleket basshysynyń 2 qyrkúiektegi Qazaqstan halqyna Joldaýynda aitylǵan tapsyrmasy boiynsha AÁK taǵaiyndaý tetigi onyń aiqyndylyǵyn, ádildigin jáne eńbekke yntasyn qamtamasyz etý maqsatynda túzetildi. Memlekettik kómektiń jańa sharalary keshendi túrde iske asyrylýda jáne oǵan: kópbalaly otbasylardy qoldaý, jańǵyrtylǵan ataýly áleýmettik kómek, tabysy az otbasylaryndaǵy balalarǵa arnalǵan kepildik berilgen áleýmettik toptama kiredi.
Aǵymdaǵy jylǵy 1 qańtardan bastap Qazaqstanda 4 jáne odan da kóp kámeletke tolmaǵan nemese 23 jasqa deiingi kúndizgi oqý bóliminde oqityn stýdent balalary bar kópbalaly otbasylarǵa arnalǵan jańa memlekettik járdemaqy engizildi. Bul memlekettik járdemaqy otbasynyń tabysyna qaramastan 42 496 teńgeden 74 388 teńgege deiin saralanǵan mólsherde tólenedi. Osyndai tólemdi aǵymdaǵy jylǵy qańtarda jalpy somasy 17,7 mlrd.teńgege 367 myń otbasy aldy.
Tabysy az otbasylarǵa ataýly áleýmettik kómek kózdelgen.
AÁK taǵaiyndaý úshin basty kriterii – otbasynyń árbir múshesine jan basyna shaqqandaǵy ortasha tabysy óńirdiń eń tómengi kúnkóris deńgeiiniń 70%-ynan tómen bolýǵa tiis.
Otbasynyń barlyq músheleri úshin AÁK mólsheri jan basyna shaqqandaǵy tabys pen kedeilik sheginiń arasyndaǵy aiyrma retinde aiqyndalady. AÁK ashyqtyǵyn qamtamasyz etý úshin ol toqsan saiyn taǵaiyndalatyn bolady, al otbasynyń materialdyq jaǵdaiyna tekserý júrgizý merzimi 3 kúnnen 7 kúnge deiin ulǵaitylady.
AÁK taǵaiyndaý kezindegi mańyzdy talaptardyń biri jumysqa qabiletti otbasy músheleriniń jumyspen qamtýǵa járdemdesý sharalaryna mindetti túrde qatysýy bolyp tabylady.
Jumyspen qamtýdy qamtamasyz etý úshin "Eńbek" memlekettik baǵdarlamasyn iske asyrý sheńberinde kópbalaly jáne tabysy az otbasylarǵa úide jumys isteý úshin de, óz isin ashý úshin de keń múmkindikter beretin jańa tetikter kózdelgen.
Budan basqa, AÁK alatyn tabysy az otbasylardyń balalaryna kepildik berilgen áleýmettik toptama usynylatyn bolady.
1 jastan 6 jasqa deiingi balalar úshin áleýmettik toptamaǵa azyq-túlik jiyntyǵy men turmystyq himiia taýarlarynyń jiyntyǵy kiredi.
6 jastan 18 jasqa deiingi balalar úshin mektepterde ystyq tamaq, oqý quraldary men mektep kiimderin berý kózdeledi. Sondai-aq, osy sanattaǵy balalar úshin mektepke deiingi jol júrý shyǵyndary óteletin bolady. Meditsinalyq, onyń ishinde stomatologiialyq kómek 18 jasqa deiingi balalarǵa tegin meditsinalyq kómektiń kepildik berilgen kólemi jáne mindetti áleýmettik meditsinalyq saqtandyrý sheńberinde kórsetiletin bolady.
Aita ketý kerek, AÁK kórsetýdiń jańa tetikteriniń engizilýine bailanysty respýblikalyq jáne jergilikti biýdjetterden tabysy az jáne kópbalaly otbasylardy áleýmettik qoldaýǵa arnalǵan qarjylandyrý kólemi ulǵaityldy.
2020 jyly bul maqsatqa 326,9 mlrd teńge bólindi (respýblikalyq biýdjetten – 279,9 mlrd teńge, jergilikti biýdjetten – 46,9 mlrd teńge). 2019 jyly AÁK tóleýge 244,2 mlrd teńge bólindi.
Jańa tásilderge sáikes aqshalai jáne zattai túrdegi áleýmettik qoldaý mólsheri tabysy az jáne balalar sany kóp otbasylar úshin kóbirek bolady. Bul rette otbasynyń árbir múshesine AÁK tóleý somasy ortasha eseppen 10 myń teńgeni quraidy, al tabysy joq otbasylarda áleýmettik kómek taǵaiyndaý úshin belgilengen kriteriiden tolyq kólemde – óńirlik kúnkóris deńgeiiniń 70%-y. Osylaisha, tabysy az otbasylar, kópbalaly otbasylarǵa beriletin memlekettik járdemaqyny eseptemegende, ár balaǵa ortasha eseppen 20 myń teńge ataýly áleýmettik kómek alatyn bolady.
Onyń 10 myńǵa jýyǵy – AÁK-tiń aqshalai tólemi, 10 myńǵa jýyǵy – zattai túrdegi kepildik berilgen áleýmettik toptama.
