Qazaqstanda qanatyn keńge jaia bastaǵan bochcha sporty Paralimpiada oiyndarynyń bir bóligi bolyp sanalady. Sonymen qatar inkliýzivti sport túri.
Aldymen Qazaqstandaǵy Bochcha federatsiiasynyń qurylý tarihy týraly aita ketsek, uiym 2021 jyly múgedektigi bar balalardy tárbielep otyrǵan ata-analardyń jáne «Teń múmkindikter álemi» qorynyń jattyqtyrýshylarynyń bastamasymen qurylǵan. Búginde federatsiianyń oqý jattyǵýlary elimizdiń barlyq 20 óńirinde júrgizilýde.
Jalpy, Qazaqstan boiynsha 10 aimaqta federatsiia ókildikteri qurylyp, jan-jaqty eńbek etip jatyr.
2023 jyly federatsiia prezidenti daýazymyna Qazaqstan Respýblikasy Parlamenti Senatynyń spikeri Máýlen Áshimbaev sailandy. Sondai-aq byltyr federatsiia resmi túrde Halyqaralyq Bochcha federatsiiasy – Boccia International Sports Federation (BISFed) múshesi boldy.
Federatsiia ulttyq jáne halyqaralyq deńgeide jarysatyn erekshe qajettilikteri bar 150-den astam sportshynyń basyn qosady. Sport qaýymdastyǵynyń alǵa qoiǵan maqsattarynyń biri – bochchadan Qazaqstan quramasyn Paralimpiada oiyndaryna shyǵarý. Qazirdiń ózinde sportshylar halyqaralyq jarystarda top jaryp júr.
Aǵymdaǵy jyldyń tamyz aiynda komanda Polshada ótken alǵashqy halyqaralyq Poznan Boccia Challenger básekesinde tamasha nátije kórsetti. Sodan soń Grekiiada ótken World Boccia Heraklion Challenger jarysynda Viktor Kojevnikov 4-oryn alsa, Qytaidyń Hanchjoý qalasynda ótken Aziia Para oiyndarynda Shyńǵyshanova Itiana 6-orynǵa ie boldy.
Negizi, bul oiynnyń tarihy bizdiń dáýirimizge deiingi júzdegen jyldar buryn bastalǵan, biraq onyń qazirgi zamanǵy túri Italiiada bastaý alǵan.
Bochcha Eýropa elderinde óte tanymal, onyń erejeleri qiyn emes, biraq belgili bir daǵdylardy qajet etedi. Sondyqtan ol negizinen múgedektigi bar jandardy ońaltý úshin qoldanylady.
Oiyn zeiindi, dáldikti, eptilikti jáne muqiiat daiyndyqty qajet etedi.
Eń bastysy, ortalyq júike júiesi men tirek-qimyl apparaty aýyr zaqymdanǵan adamdar úshin bochcha taptyrmas sport túri. Sondai-aq sportshynyń fizikalyq jaǵdaiyna jaqsy áser etedi, múgedekterdiń áleýmettenýine kómektesedi jáne olardyń oilaýyn damytady.
Oiynnyń erejesi mynadai: bastapqy dopty laqtyratyn oiynshy jerebe arqyly anyqtalady. Kelesi laqtyrý kezinde oiynshylar doptaryn múmkindiginshe bastapqy dopqa jaqyn ornalastyrýǵa tyrysady. Osydan keiin qatysýshylar kimniń doptary bastapqy dopqa jaqyn ekenin anyqtaidy jáne upai jinaidy.
Upailardy qorytyndylaý arqyly oiynshylardyń qaisysy eń kóp upai jinaǵany anyqtalady. Bul oiynshy (nemese komanda) oiynda jeńiske jetedi jáne kelesi oiynda birinshi laqtyrý múmkindigin alady.
Al osy oiyn túriniń elimizde keńinen etek jaiýyna septesip júrgen atymtai jomart azamattar az emes. Solardyń qatarynda Erlan Andasbaevty airyqsha atap ótý qajet. "Aneko group" kompaniiasynyń iesi sanalatyn metsenat "Coca-cola" jáne sol deńgeidegi basqa da álemdik brendterdiń Qazaqstandaǵy distribiýtory. Taǵy bir kompaniiasy "Food-master" brendiniń qoima qyzmetin aýtsorsing júiesi boiynsha basqarady.
Erlan Andasbaevtyń paiymynsha, árbir kásipkerdiń bir muraty – áleýmettik baǵytta qaiyrymdylyq kórsetý bolýy qajet. Bul ári týǵan el men jerge qyzmet etýge saiady.
Metsenattyń bir qyry – ol álemdi kezip júrgen saiahatshy. Dúnieniń kóptegen elderine tabany tigen. Damyǵan memleketter múgedektigi bar azamattaryn syrt teppei, qaita qoǵamǵa tartady, kómektesedi. Ol da bizdiń elimizdiń sol deńgeige shyǵýyna kúsh salǵysy keledi. Osy oraida, kásipker Qazaqstanda bochchanyń ilgerileýine tamshydai bolsa da úles qosqanyn maqtan tutady.
