Arman Jumageldievtiń qylmystyq toby Almaty qalasynda jappai tártipsizdikter uiymdastyrý jáne azamattardy urlap áketý boiynsha aiyptalyp, sottaldy, dep habarlaidy Dalanews.kz.
27 qańtarda Almaty qalasy qylmystyq ister jónindegi mamandandyrylǵan aýdanaralyq sotynda Arman Jumageldievtiń qylmystyq tobynyń basshylary men qarýly tobynyń múshelerine, sondai-aq QR UQK 5-bóliminiń eks-basshysy Rýslan Ysqaqovqa, Almaty qalasy máslihatynyń eks-depýtaty Qairat Qudaibergenge jáne basqa tulǵalarǵa qatysty qylmystyq is qaraldy.
Sot 2016 jyly UQK 5-bóliminiń basshysy bolǵan kezinde Ysqaqov ulttyq qaýipsizdik organdarynyń qoldaýyna ýáde berip, Jumageldievti yntymaqtastyqqa tartqanyn anyqtady.
UQK-niń qoldaýyna ie bolǵan Jumageldiev Qazaqstan aýmaǵynda jáne odan tysqary jerlerde qylmystyq yqpalyn keńeitý maqsatynda qylmystyq uiym qurǵan.
Osy maqsatta qylmystyq uiymǵa basty rólderge burynnan tanityn, psihologiialyq turaqtylyǵy joǵary, qylmystyq qýdalaýdan qoryqpaityn jáne fizikalyq daiyndyǵy myqty adamdar tartyldy.
Jumageldievtiń qylmystyq uiymy músheleri uiymdyq, fýnktsionaldyq jáne aýmaqtyq turǵyda bólingen toptarǵa bólinip, tikelei oǵan baǵyndy.
Ysqaqov basqarǵan UQK bólimshesi Jumageldievtiń qylmystyq tobyna básekeles birqatar uiymdasqan qylmystyq toptardy joiǵanymen, Jumageldiev tobynyń zańsyz áreketterin toqtatýǵa eshqandai shara qoldanbaǵan.
2017 jyldyń jeltoqsanynan bastap Jumageldiev qylmystyq uiymyn Túrkiia Respýblikasynan basqaryp, uiym jetekshileri men músheleriniń jiyndaryn Qazaqstanda, Túrkiiada jáne BAÁ-de ótkizgen.
Uiym júieli túrde yqpal aiasyn keńeitý jáne qarjylyq paida tabý maqsatynda qurbandardy izdeýmen ainalysty. Mysaly, 2021 jyldyń maýsymynda uiym músheleri Túrkistan oblysynyń turǵynynyń 25 mln teńge qaryzy bar ekenin bilip, ony uryp-soǵyp, 23 mln teńge tóleýge májbúrlegen.
2022 jyldyń basynda Ysqaqov, Jumageldiev jáne Qudaibergen bilikti kúshpen basyp alý maqsatynda jappai tártipsizdikterdi uiymdastyrýǵa basty ról atqarǵan.
Qańtar oqiǵasy kezinde Qudaibergen «Qazaqstan» qonaqúiinde shtab quryp, Jumageldiev tobyn shaqyryp, olardy qarýly toptyń áreketterin úilestirýge jumyldyrǵan.
Sot 2022 jyldyń 5 qańtarynda Jumageldievtiń toby eki ret Almaty qalasynyń Respýblika alańyna jinalyp, jappai tártipsizdikke qatysýshylardy biriktirý jáne bilikke talap qoiý úshin «Halyq keńesin» qurýdy josparlaǵanyn anyqtady.
Sot 2022 jyldyń qańtarynda qylmystyq top beibit turǵyndardy zańsyz ustap, olardy «Qazaqstan» jáne «The Ritz Carlton Almaty» qonaqúilerinde qamaýda ustaǵanyn anyqtady. Ustalǵandardy uryp-soǵyp, mazaqtap, jalǵan aiǵaq berýge májbúrlegen.
Sot sheshimimen Jumageldiev QR QK-niń birneshe baptary boiynsha kináli dep tanylyp, 20 jylǵa bas bostandyǵynan aiyryldy. Ysqaqov – 15,6 jyl, Qudaibergen – 8 jyl, top músheleri – 10-15,5 jylǵa, basqa qatysýshylar – 1,5-7 jylǵa sottaldy.
Úkim zańdy kúshine engen joq.
