Ortalyq mamandary ákim-qaralardyń qarym-qabiletin kelesidei kriteriiler boiynsha baǵalapty:
- Halyqtyń aimaq basshysynyń jumysyna qanshalyqty kóńili tolady?
- Saiasatker retinde erteńgi kúni ósý-órleý múmkindigi bar ma?
- Aimaqtyń ekonomikalyq jaǵdaiynan qanshalyqty habardar: ismer me, isker me?
- Óńirdegi ishki saiasi ahýaldy qanshalyqty nazarynda ustaýda (aimaqtaǵy klandardyń teketiresinde tepe-teńdik saqtaýda qandai amal-ádiske júginedi)?
- Ashyqtyq deńgeii qanshalyqty, tórtinshi bilik ókilderinen tartynyp júre me, álde ashylyp sóileýge beiim be? Álemjelidegi belsendiligi qandai?
“Strategiia” sarapshylary ákimderdiń álýetin 7 balldyq deńgeimen baǵalaǵan eken.
…
Biylǵy jyldyń alǵashqy shiregindegi alamanda Túrkistan oblysynyń ákimi Ómirzaq Shókeev ózgelerden oq boiy ozyq kelipti. Reitingtiń ótken jylǵy úzdigi BQO ákimi Ǵani Esqalievty artta qaldyrǵan Shókeev qandai qabiletimen daralandy? Top bastaityndai ne tyndyrdy, ne bitirdi?
“Oblys ortalyǵyndaǵy qurylys sapasyna qatysty skandalǵa tap bolyp, daýǵa qalǵanyna qaramastan óz pozitsiiasyn myqtai tústi.
Shókeev sharýaqor ákim, myqty krizis-menedjer. Alaida onyń da synalar shaǵy alda.
Oblystaǵy mega-jobalarǵa quiylyp jatqan asta-tók investitsiiany ornymen jumsap, durys arnaǵa baǵyttaý mindeti tur” – deidi “Strategiia” sarapshylary.
Ortalyq mamandary “Shókeevtiń “aqparattyq ashyqtyǵy” aqsap tur” dep sanaidy. Oǵan osy sanatta tómen baǵa qoiylǵan eken.
…
Osy oraida "Strategiiadaǵylar" Nur-Sultan qalasynyń ákimi Altai Kólginovti erekshe atap ótipti.
“Turǵyndarǵa Kólginovtyń “aqparattyq ashyqtyǵy” unaidy.
Qala halqynyń tarapynan synǵa ushyrasa da muny qalypty dúnie dep qabyldaidy. Synnan sabaq alýǵa tyrysady.
Aqparat quraldarynyń aldynda árdaiym ashyq, tórtinshi bilik ókilderimen pikir almasýǵa árkezde ázir turady”, – deidi sarapshylar.
…
Shókeevten keiingi satyǵa BQO ákimi Ǵani Esqaliev jaiǵasypty. “Strategiiadaǵylar” Esqalievtyń jumysyndaǵy aqaýlardy jipke tizip, “bir kezderi reitingtiń kóshin bastaǵan ákim sońǵy kezde tym bosańsyp ketti” degen toqtamǵa kelipti.
BQO ákimi “Aimaq ekonomikasyn damytýda” burynǵy iskerligi men ismerliginen aiyrylyp alǵan.
Tiisinshe, “Turǵyndardyń aimaq basshysynyń jumysyna qanshalyqty kóńili tolady?” degen pýnktide biraz pozitsiia joǵaltqan.
Óńir halqynyń aimaq basshysyna aitary bar, qarapaiym halyqtan alystap ketkenine qapaly.
“Esqaliev halyqtyń muń-muhtajyna kóńil bólýdi qoidy. Óńir turǵyndarynyń talap-aryzyna qulaq asyp, indet aýa jaiylǵan shaǵynda kerekti, qajetti zattarmen qamtamasyz etýdi umytty.
Esqaliev? Qazir ol eshkimge keregi joq, esep berýmen ainalysyp júr. Aimaqtaǵy mektepterge ne jetispeidi, meditsina qyzmetiniń sapasy syn kótere me, óńirdegi ekologiialyq ahýal qashan túzeledi, infraqurylym baǵytynda ne atqarylyp, ne tyndyryldy.
Ákim birinshi kezekte nazar aýdarýǵa mindetti máseleler syldyr sóz ben qurǵaq eseptiń qalqasynda qalýda”, – deidi sarapshylar.
…
Odan keiingi orynǵa Qaraǵandy oblysynyń ákimi Jeńis Qasymbek jaiǵasqan eken. Onyń úshinshi orynǵa bir-aq yrǵýyn mamandar “jas kelse, iske” degen paiymmen bailanystyryp otyr.
SQO ákimi Qumar Aqsaqalov 4-shi orynǵa taban tirepti.
“Bul óńir elimizdegi eń kedei aimaq. Oblystyń máselesin sheshýge Aqsaqalovtyń qolyndaǵy biýdjet azdyq etip otyr. Soǵan qaramai orystildi aýditoriia jappai teriskei óńirge aýyp jatqan aimaqty qolynan kelgenshe gúldendirýge tyrysýda”, – deidi “Strategiia” ortalyǵy.
Almaty oblysynyń ákimi Amandyq Batalov pen Jambyl oblysynyń basshysy Berdibek Saparbaev tiisinshe 5-shi jáne 6-shy orynǵa turaqtapty.
“Batalov? Ol óńirdiń ishki saiasi ahýalyn jetik biledi. Aimaqtaǵy aýzy dýaly azamattardy tóńiregine toptastyryp otyr. Óńirdiń ekonomikalyq jaǵdaiynan da óte jaqsy habardar.
Saparbaev? Ol ózi basqaratyn óńirdiń ekonomikalyq álýetin ábden zerdelegen. Ilgeridegi áriptesi sekildi óńirdiń ishki saiasi ahýalyn bes saýsaǵyndai biledi. Biraq, Berdibek myrza biraz jasqa kelip qaldy. Onyń saiasi mansaby Jambyl oblysymen támámdalýy múmkin”, – degen eken ortalyq sarapshylary.
Budan bólek Saparbaevtyń aimaqtaǵy ultaralyq ahýaldy baqylaýdan shyǵaryp alǵanyn aitady. Sonyń saldarynan, túneýkúngi janjaldan keiin quqyq qorǵaý organdary arasynda óńirdegi dunǵandarǵa qatysty teris pikir qalyptasqan.
Kósh sońynda kelgen ákimder arasynda Mańǵystaý oblysy men ShQO ákimi “kósh bastap” tur.
Sarapshylar Serikbai Turymov pen Danial Ahmetovtyń jumysyna jergilikti turǵyndardyń múlde kóńili tolmaidy dep paiymdaidy.
Ázirlegen, Dýman BYQAI
