Klımaty qurǵaq, shóldi, jaz mezgili uzaq bolatyn Túrkistandy kógaldandyrý úshin eń aldymen sýlandyrý júıesin jetildirý mańyzdy. Máseleni sheshý – basty nazarda. Osy maqsatta oblys ákimi Ómirzaq Shókeevtiń jeke baqylaýymen, Túrkistanda jan-jaqty zerttelip, zerdelengen keshendi joba boıynsha aýqymdy ister atqarylýda, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Eń aldymen, qalanyń birneshe baǵytynan keletin kishi kanaldar kúrdeli jóndeýden ótkizilip, qalaǵa sý tartyldy. Túrkistan aýmaǵynda júzdegen sý arnalary paıda boldy. Rýhanı-mádenı ortalyq pen Ákimshilik-iskerlik ortalyqta jáne irgeles jatqan aýmaqtaǵy kóshelerde salynatyn joldardyń boıyna jobamen 100 shaqyrym aryqshalar ornatyldy. Bul – Túrkistannyń ekologıasyn ońaltyp, klımatyn jaqsartý úshin jasalatyn oń qadamdar.

«Túrkistan magıstraldy kanalyn kúrdeli jóndeý» jobasy, «Keńsaı-Qosqorǵan-2» sý qoımasyn salý, «Mashınalyq ádispen sý berý», «Jetikól kólder júıesin jańǵyrtý» jumystary bastaldy. Túrkistan qalasy Bas josparynyń jobasyna sáıkes, qala aınalasynan 8 myńǵa jýyq gektar aýmaqqa «Jasyl beldeý» qurý jospary jyl sońyna deıin tolyq júzege asady. Bul jazy ystyq Túrkistannyń jasyl jelekke oranýyna sep bolady.

Sýlandyrý jumystaryn júrgizý arqyly qala ishindegi jáne aınalma jol boıynda otyrǵyzylǵan aǵash kóshetteri men jasyl jelekti sýǵarýǵa tolyq múmkindikter bolady. Osy aryqshalardan kelgen sý Kesene aýmaǵynda ornalasqan Tuńǵysh Prezıdent saıabaǵyndaǵy jasandy kólge kelip quıatyn bolady. Túrkistan áýejaıynyń aýmaǵynda 140 myń jasyl jelek, 200 myń qara órik otyrǵyzyldy. Bul da shahardyń jasyl jelekke oranýyna sep bolmaq.

Qaladaǵy qurylys alańdaryn aralǵan Ómirzaq Estaıuly jańadan boı kótergen «Dendro saıabaq» pen ondaǵy jasandy kóldiń qurylys barysymen tanysty. Jasandy sý aıdynynyń qurylysy aıaqtalýǵa jaqyn. Jaqyn kúnderi munda sý keledi.

Túrkistan sáýletshileri oblys ákiminiń tapsyrmasymen jańa sý arnasynyń jobasyn daıyndady. Joba júzege asqan jaǵdaıda, uzyndyǵy 9 shaqyrymdy quraıtyn jańa kanal paıda bolady. Osylaısha «Keńsaı-Qosqorǵan» sý qoımasynan keletin aǵyn sý

Iasaýı kesenesiniń aýmaǵyndaǵy Tuńǵysh Prezıdent saıabaǵy men qala irgesinde ornalasqan atraksıondar parkine deıin sozylady.

Aıta keteıik, Túrkistan qalasyn sýmen qamtamasyz etýde jer beti sýlarymen qatar, jer asty sýlarynyń da mańyzy zor. Jaramsyz bolyp qalǵan 150 tik uńǵymalardy qaıta qalpyna keltirý arqyly jylyna qosymsha 190 mln tekshe metr aǵyn sý tapshylyǵyn sheshýge qol jetkiziledi.