Qazaqstanda aýyl sharýashylyǵyn ártaraptandyrý baǵytynda kóptegen jumystar atqarylýda. Búginde esik aldynda bes-alty iri qarany baǵap, paiǵa alǵan jerge jońyshqa egip júre berýge bolmaidy. Osy rette jer emgen sharaýlar óz tirshilikterin ártaraptandyrýǵa kúsh salǵany jón. Bul rette sharýalarymyz Túrkistan oblysyndaǵy áriptesterinen úlgi alýyna bolady. Búginde túrkistandyq sharýalar úi irgesinde jylyjai salyp, tez ósetin poloniia aǵashyn egip, paida tabýda.
Eldegi klimattyq jaǵdai biraz jerde jylyjai sharýashylyǵyn damytýǵa múmkindik beretini sózsiz. Sondyqtan sharýalarymyz osy baǵytta jumys istep, elimizdiń azyq-túlik qaýipsizdigine óz úlesin qosýy tiis dep esepteimiz. Qysta aýyl sharýashylyǵy ónimderin úzdiksiz óndirip, ony saýdaǵa shyǵarsaq mol paidaǵa kenelýge bolady. Óndirgen ónimniń qalǵanyn ainalamyzdaǵy kórshilerimizge eksporttap, paida tabýdyń da jolyn qarastyrsaq artyq bolmas edi.
Jalpy, jylyjai óndirisi ishki naryqty turaqty túrde kókónistermen, jemistermen jáne basqa da aýyl sharýashylyq ónimderimen qamtamasyz etýde mańyzdy ról atqarady. Osy rette ómir boiy qarýly qaqtyǵystan kóz ashpasa da tamshylatyp sýarý júiesin oilap taýyp, álemge aýyl sharýashylyǵy damyǵan el retinde tanylǵan Izraildiń is-tájiribesin muqiiat zerdelep, kádege jaratýymyz kerek.
Áńgime basynda jylyjai óndirisi Túrkistan oblysynda jaqsy damyǵanyn alǵa tarttyq. Qazir elimizdegi jylyjailardyń 95 paiyzdan astama osy oblystyń enshisinde. Túrkistan oblysynyń tabiǵaty jyly, jylyjai óndirisin órkendetýge qolaily aimaq. Biraq elimizde jylyjai óndirisin damytýǵa ózge óńirlerde de múmkindik bar ekenin umytpaýymyz kerek. Bul rette Jambyl, Almaty, Jetisý, Qyzylorda, Atyraý oblystarynda da jylyjai óndirisin damytýdy qolǵa alýǵa bolady. Ásirese Túrkistan oblysymen irgeles jatqan Jambyl men Almaty, Jetisý oblystary bul iske suranyp tur desek artyq aitqandyq bolmas edi.Bizdiń bul áńgimemiz atalǵan óńirlerdiń sharýalardyń qulaǵyna altyn syrǵa dep esepteimiz.
Qazirgi tańda elimizde jylyjai sharýashylyǵyn qoldaý maqsatynda memleket tarapynan sýbsidiialar, jeńildikti nesieler jáne aýyl sharýashylyq ónimderin óndirýshilerge arnalǵan baǵdarlamalar júzege asyrylýda. Bul sharalar salaǵa investitsiia tartýǵa jáne jańa zamanaýi jylyjai keshenderin salýǵa múmkindik beredi. Memleket «Agrobiznes –2025» jáne basqa da baǵdarlamalar arqyly jylyjai keshenderin damytýǵa arnalǵan jobalardy qoldaidy.
Sońǵy jyldary jylyjai óndirisimen ainalysatyn sharýashylyqtar zamanaýi tehnologiialarǵa jatatyn gidroponika, aeroponika jáne avtomattandyrylǵan basqarý júieleri keńinen eńgizýde. Bul tehnologiialar ónimdilikti arttyryp, sýdy, energiiany tiimdi paidalanýǵa múmkindik beredi. Sonymen qatar, klimattyq basqarý júieleri ósimdikterdiń ósip-óný jaǵdailaryn jaqsartyp, qys mezgilinde de ónim óndirýge jaǵdai jasaidy. Osyndai jańa tehnologiialardy paidalansaq, jarty Qazaqstanda jylyjai qysy-jazy jylyjai biznesin damytýǵa bolady. Bir ǵana jylyjai biznesi arqyly aýyl sharýashylyǵy salasyn barynsha ártaraptandyryp, kóptegen jumystar atqarýǵa bolady.
