Túrkistan qalasynda Raiymbek Seitmetov atyndaǵy
Túrkistan qalasynyń sazdy-drama teatry mereili XXV maýsymnyń shymyldyǵyn túrdi. Jańa maýsym teatrdyń tólqujatyna ainalǵan B.Vahapzadeniń «Kók túrikter» qoilymymen ashyldy, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Is-sharaǵa ziialy qaýym ókilderi de arnaiy kelip tamashalady. Maýsymasharmen quttyqtap, izgi lebizderin arnady. Kelýshilerge teatr janynan ashylǵan Raiymbek Seitmetov murajai úiinen teatrdyń 25 jyldan beri kele jatqan qundy jádigerler men alǵan marapattary kórme retinde usynyldy. Ǵimarat aldynda jandy daýystaǵy ásem shyǵarmalar kópshilikke merekelik kóńil-kúi syilady.
«Kók túrikter» tarihi tragediiasy zamanymyzdaǵy 630 jyly Qytai imperiiasy jeńiliske ushyratqan I Kók Túrik Qaǵanatynyń ult azattyq kúresin sýretteidi. Bul tarihi qoiylymda Qytaidyń saiasaty túrki qaǵanatynyń ishinen iritki salyp, bilik, mansap úshin baýyrlas adamdar bir-biriniń qanyn tógýge deiin barady. Qytai imperiiasy qýlyq, ailakerliktiń arqasynda eshqashan jeńilistiń ashy dámin tatpaǵan, uly Kók Túrik qaǵanatyna shabýyl jasap orasan zor zardap ákeledi. Alaida aýyzbirshilik pen yntymaqtyń arqasynda Kók túrik memleketi óziniń eldigin saqtap qalady.
Basty rólderdi Murat Qurmanbekov, Gúlzada Aitbaeva, Aidar Naýryzbaev, Mahanov, Aiaz Iliasov, Oljas Sarsenov, Talǵat Qarynbaev, Maira Maqulbekova, Raýan Shyrynbekov, Kamshat Ashtekova, Qanat Sadyqbekov, Almagúl Indemesova, Ǵalymjan Jakipov syndy ártister somdap shyqty.
Qoiylymdy alǵash ret qazaq teatr óneriniń maitalmany, QR Eńbek sińirgen ártisi, QR Halyq ártisi, Táýelsiz «Platinaly Tarlan» syilyǵynyń bas júldegeri, professor Raiymbek Seitmetov sahnalaǵan. Qoiylymda mýzykalyq kórkemdeýshi – Arman Dúisenov, qoiýshy sýretshi – Qaltóre Jumaǵulov. Teatr atalǵan qoiylymmen 2000 jyly Almaty qalasynda ótken «Evropa birligi» festivaline qatysqan. Birinshi kúni eldiń atynan B. Vahapzadeniń «Kók túrikter» spektaklin oinasa, ekinshi kúni Túrkiia memleketiniń arnaiy ótinishimen spektakl túrik tilinde sahnalandy. 2000 jyly Túrkiia memleketiniń arnaiy shaqyrtýymen Ankara, Sivas, Kaiseri, Qyryqkále, Koniia, Nidde, Mataliia, Erzým, Gersýn, Antaliia, Sparta siiaqty qalalarynda gastroldik saparǵa baryp qaitty. 2001 jyly 1 qarashada teatrda Elbasy qonaqta bolyp, osy spektakldi tamashalaǵan bolatyn.
