تۇركىستان قالاسىندا رايىمبەك سەيتمەتوۆ اتىنداعى
تۇركىستان قالاسىنىڭ سازدى-دراما تەاترى مەرەيلى XXV ماۋسىمنىڭ شىمىلدىعىن ءتۇردى. جاڭا ماۋسىم تەاتردىڭ ءتولقۇجاتىنا اينالعان ب.ۆاحاپزادەنىڭ «كوك تۇرىكتەر» قويلىمىمەن اشىلدى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ءىس-شاراعا زيالى قاۋىم وكىلدەرى دە ارنايى كەلىپ تاماشالادى. ماۋسىماشارمەن قۇتتىقتاپ، ىزگى لەبىزدەرىن ارنادى. كەلۋشىلەرگە تەاتر جانىنان اشىلعان رايىمبەك سەيتمەتوۆ مۇراجاي ۇيىنەن تەاتردىڭ 25 جىلدان بەرى كەلە جاتقان قۇندى جادىگەرلەر مەن العان ماراپاتتارى كورمە رەتىندە ۇسىنىلدى. عيمارات الدىندا جاندى داۋىستاعى اسەم شىعارمالار كوپشىلىككە مەرەكەلىك كوڭىل-كۇي سىيلادى.
«كوك تۇرىكتەر» تاريحي تراگەدياسى زامانىمىزداعى 630 جىلى جۇڭگو يمپەرياسى جەڭىلىسكە ۇشىراتقان I كوك تۇرىك قاعاناتىنىڭ ۇلت ازاتتىق كۇرەسىن سۋرەتتەيدى. بۇل تاريحي قويىلىمدا قىتايدىڭ ساياساتى تۇركى قاعاناتىنىڭ ىشىنەن ىرىتكى سالىپ، بيلىك، مانساپ ءۇشىن باۋىرلاس ادامدار ءبىر-بىرىنىڭ قانىن توگۋگە دەيىن بارادى. جۇڭگو يمپەرياسى قۋلىق، ايلاكەرلىكتىڭ ارقاسىندا ەشقاشان جەڭىلىستىڭ اششى ءدامىن تاتپاعان، ۇلى كوك تۇرىك قاعاناتىنا شابۋىل جاساپ وراسان زور زارداپ اكەلەدى. الايدا اۋىزبىرشىلىك پەن ىنتىماقتىڭ ارقاسىندا كوك تۇرىك مەملەكەتى ءوزىنىڭ ەلدىگىن ساقتاپ قالادى.
باستى رولدەردى مۇرات قۇرمانبەكوۆ، گۇلزادا ايتبايەۆا، ايدار ناۋرىزبايەۆ، ماحانوۆ، اياز يلياسوۆ، ولجاس سارسەنوۆ، تالعات قارىنبايەۆ، مايرا ماقۇلبەكوۆا، راۋان شىرىنبەكوۆ، كامشات اشتەكوۆا، قانات سادىقبەكوۆ، الماگۇل يندەمەسوۆا، عالىمجان جاكيپوۆ سىندى ارتىستەر سومداپ شىقتى.
قويىلىمدى العاش رەت قازاق تەاتر ونەرىنىڭ مايتالمانى، ق ر ەڭبەك سىڭىرگەن ءارتىسى، ق ر حالىق ءارتىسى، تاۋەلسىز «پلاتينالى تارلان» سىيلىعىنىڭ باس جۇلدەگەرى، پروفەسسور رايىمبەك سەيتمەتوۆ ساحنالاعان. قويىلىمدا مۋزىكالىق كوركەمدەۋشى – ارمان دۇيسەنوۆ، قويۋشى سۋرەتشى – قالتورە جۇماعۇلوۆ. تەاتر اتالعان قويىلىممەن 2000 جىلى الماتى قالاسىندا وتكەن «ەۆروپا بىرلىگى» فەستيۆالىنە قاتىسقان. ءبىرىنشى كۇنى ەلدىڭ اتىنان ب. ۆاحاپزادەنىڭ «كوك تۇرىكتەر» سپەكتاكلىن ويناسا، ەكىنشى كۇنى تۇركيا مەملەكەتىنىڭ ارنايى وتىنىشىمەن سپەكتاكل تۇرىك تىلىندە ساحنالاندى. 2000 جىلى تۇركيا مەملەكەتىنىڭ ارنايى شاقىرتۋىمەن انكارا، سيۆاس، كايسەري، قىرىقكالە، كونيا، نيددە، ماتاليا، ەرزۋم، گەرسۋن، انتاليا، سپارتا سياقتى قالالارىندا گاسترولدىك ساپارعا بارىپ قايتتى. 2001 جىلى 1 قاراشادا تەاتردا ەلباسى قوناقتا بولىپ، وسى سپەكتاكلدى تاماشالاعان بولاتىن.
