Belgili aǵartýshy Sanjar Kerimbai eks-prezident Nursultan Nazarbaevtyń Ǵylym akademiiasyna jasaǵan qastandyǵy týraly aitty, - dep habarlaidy Dalanews.kz.
Sanjar Kerimbaidyń sózinshe,Qazaqstan táýelsizdik alǵannan keiin professor Shapyq Shókin Nazarbaevpen kezdesip, Ǵylym akademiiasyn qalypqa keltirýdi usynǵan.
"Shókin "Nursultan Nazarbaev táýelsiz memlekettiń basshysy boldy, akademiiany 1946 jylǵydai qaitadan quraiyq, mynalar byt-shytyn shyǵardy ǵoi" dep aitamyn dep oilady. Qabyldaýyna barǵan. Nazarbaev Shókinge "Halyq qaharmany" degen medaldi beremin dep aldaǵan. Sóitse Shókin: "Nursultan, maǵan seniń medaliń kerek emes. Odan da Qanysh Sátbaevtyń akademiiasyn qaitadan quryp bershi" degende Nazarbaev "aǵa, ýaiymdamańyz, úiińizge bara berińiz" dep jiberedi.
Biraq erteńine 1996 jyly akademiiany taratyp jiberedi. Qoǵamnyń astyndaǵy bylyqtyń qalqyp shyǵyp ketýi Ǵylym akademiiasynyń taraýynan bastalady. Halyqty órkenietke súireitin ǵalymdardyń ortasyna bomba tastap, shashyp jiberdi. Olardyń aqshasyn qysyp, aqyr aiaǵynda aktivterin jekeshelendirip alǵan. Ár jerdegi zertteý institýttaryn, olardyń sanatoriin tartyp alǵan. Ol jinalysta Maǵaýin bolǵan. Onyń bárin esteliginde jazǵan", - deidi Sanjar Kerimbai Qazaq Airan-ǵa bergen suhbatynda.
Onyń sózinshe, bul máseleni prezident Qasym-Jomart Toqaev túsingen.
"Toqaev memleketti ustap turý úshin ǵylym akademiiasyn qalypqa keltirip, barlyq ǵalymdy shoǵyrlandyryp, Sátbaevtyń kezindegidei rettemese, halyq laǵyp, kóringen ezoterikalyq ilimge ilinip ketetinin túsindi. Prezident "óz kósemderińdi sailap alyńdar" dep otyra almaidy, sebebi onyń bári Nazarbaevtyń tusynda ketken.
Sonymen qazir qaitadan ǵylymǵa beiimi bar adamdardy jinap, otyrǵyzyp, kúresip jatyr. Biraq satylyp ketken aktivter bar, jekeshelenip ketken ǵimarattar bar, onyń bárin qashan qaitaryp alasyń? Oligarhtar ony bere me? Onyń ústine ǵylymǵa beiimi bar adamdardyń bári ne aralas mektepte, ne orys mektepte oqyǵan. Al olardyń boiynda Sátbaevtyń, Áýezovtiń boiynda bar rýhani, mádeni, ultshyldyq sezimi joq. Bárin qaitadan qalyptastyrý kerek", - deidi Sanjar Kerimbai.
Eske salaiyq, buǵan deiin akademikter Ǵylym jáne joǵary bilim ministri Saiasat Nurbekti Prezident Qasym-Jomart Toqaevtyń Ulttyq Ǵylym akademiiasyn (UǴA) transformatsiialaý jónindegi tapsyrmasyn oryndaýdy keshiktirip jatqany úshin aiyptaǵan bolatyn.
"Qazaqstannyń ǵylymi-akademiialyq salasyn transformatsiialaý protsesi áli aiaqtalǵan joq ári bul sharýa tótenshe jaǵdaida ótkizilip jatyr. Óitkeni prezident Qasym-Jomart Toqaevtyń Ǵylym akademiiasyna memlekettik mártebe berý jónindegi tapsyrmasy sheńberinde ony qoǵamdyq birlestikten jańa uiymdyq-quqyqtyq formaǵa transformatsiia júrgizý bylai tursyn, múlde joiý baǵytyndaǵy túrli is-áreketterge ainaldy", - delingen UǴA málimdemesinde.
Akademikterdiń sózinshe, Ǵylym jáne joǵary bilim ministrligi Prezidenttiń tapsyrmasyn eki jyldan beri oryndamai keledi.
Málimetke súiensek, akademiia quramyna qazir 146 akademik jáne 74 korrespondent múshelik etedi.
