Abaı oblysynda jańa Konstıtýsıany qabyldaý jónindegi respýblıkalyq referendýmǵa daýys berý jalǵasyp jatyr, dep habarlaıdy Dalanews.kz.
Oblys ákimi Berik Ýálı Semeı qalasyndaǵy Medısınalyq ýnıversıtet ǵımaratynda ornalasqan №93 referendým ýchaskesine baryp, óz tańdaýyn jasady. Aımaq basshysy bul kúnniń el úshin mańyzy erekshe ekenin atap ótip, Abaı eliniń jurtshylyǵy azamattyq belsendilik tanytatynyna senim bildirdi.
Oblys aýmaǵynda barlyǵy 465 referendým ýchaskesi jumys istep jatyr. Onyń – 429-y ashyq, 36-sy – jabyq ýchaske. Oblys boıynsha 400 151 saılaýshy daýys berýge quqyly. Ashyq ýchaskelerdiń barlyǵynda turǵyndar úshin mádenı is-sharalar, jármeńkeler men túrli aksıalar uıymdastyrylǵan.
Referendým ýchaskelerinde daýys berýshilerge qolaıly jaǵdaı jasalǵan. Ýchaskeler qajetti ınfraqurylymmen jabdyqtalyp, daýys berý prosesi belgilengen tártippen ótýde. Ýchaskelerde pandýstar ornatylyp, arnaıy kórsetkishter men yńǵaıly daýys berý kabınalary qarastyrylǵan. Qajet bolǵan jaǵdaıda ýchaskelik komısıa músheleri azamattarǵa aqparattyq kómek kórsetedi. Densaýlyǵyna baılanysty ýchaskege kele almaıtyn azamattar úshin tasymaldy jáshik arqyly úıde daýys berý múmkindigi uıymdastyrylǵan. Óńirde 2164 múmkindigi shekteýli azamattyń derekteri naqtylanyp, olardyń qaı ýchaskege tirkelgeni tekserilgen.
Referendýmdy ótkizýge óńirde bir oblystyq, eki qalalyq, 10 aýdandyq jáne 465 ýchaskelik komısıa qatysýda. Komısıalardyń quramynda 3254 adam jumys isteıdi. Daıyndyq kezeńinde olardyń barlyǵy arnaıy oqytýdan ótti.
Oblysta búgin 28 ınvataksı jumys isteıdi. Onyń ishinde Semeı qalasynda 21 arnaıy kólik qyzmet kórsetedi. Budan bólek 6 sýrdoaýdarmashy jáne áleýmettik qyzmetkerler tartylǵan.
