15 naýryz kúni Qaratal aýdanynnyń Kálpe aýylynda referendým joǵary belsendilikpen ótýde. Aýyl turǵyndary uiymshyldyq pen birliktiń jarqyn úlgisin kórsetip, bir mezette 400-ge jýyq adam daýys berýge jinaldy, dep habarlaidy Dalanews.kz.
Kálpe aýylyna qarasty 14 kósheniń turǵyndary №157 sailaý ýchaskesine kelip, ózderiniń azamattyq tańdaýyn jasady. Eldik mańyzy bar naýqanǵa aýyl halqy erekshe jaýapkershilikpen qarap, belsendilik tanytty.
Bir ereksheligi, referendým Naýryznamanyń onkúndigimen tuspa-tus kelip, aýylda erekshe merekelik kóńil kúi qalyptastyrdy. Sailaý ýchaskesiniń mańynda tigilgen kiiz úide jinalǵan turǵyndarǵa ulttyq taǵamdar usynyldy. Jastar altybaqan teýip, balalar asyq atyp, aýyl ishi ulttyq dástúrge sai dýmanǵa ulasty.
«Qarty bar úidiń qazynasy bar» demekshi, aýyldyń toqsannan asqan qariialary da bul mańyzdy naýqannan shet qalmady. 1934 jyly dúniege kelgen Súleimen Andasbaev ómiriniń 40 jylyn mal dárigeri qyzmetine arnap, el igiligi úshin eńbek etken. Al Báten Buldybaeva apamyz densaýlyq saqtaý salasynda uzaq jyl qyzmet atqarǵan ardager maman. Ǵasyrdy eńsergen qos qariia da sailaý ýchaskesine arnaiy kelip, óz tańdaýlaryn jasady.
Bul – úlkenderdiń el taǵdyryna beijai qaramaitynyn kórsetetin ónegeli is ári jas urpaqqa úlgi.
Osylaisha №157 sailaý ýchaskesinde ótken referendým aýyl turǵyndarynyń birligi men azamattyq belsendiligin aiqyndaǵan mańyzdy kún retinde kópshiliktiń esinde saqtalary anyq.
