15 ناۋرىز كٷنٸ قاراتال اۋدانىننىڭ كەلپە اۋىلىندا رەفەرەندۋم جوعارى بەلسەندٸلٸكپەن ٶتۋدە. اۋىل تۇرعىندارى ۇيىمشىلدىق پەن بٸرلٸكتٸڭ جارقىن ٷلگٸسٸن كٶرسەتٸپ, بٸر مەزەتتە 400-گە جۋىق ادام داۋىس بەرۋگە جينالدى, دەپ حابارلايدى Dalanews.kz.
كەلپە اۋىلىنا قاراستى 14 كٶشەنٸڭ تۇرعىندارى №157 سايلاۋ ۋچاسكەسٸنە كەلٸپ, ٶزدەرٸنٸڭ ازاماتتىق تاڭداۋىن جاسادى. ەلدٸك ماڭىزى بار ناۋقانعا اۋىل حالقى ەرەكشە جاۋاپكەرشٸلٸكپەن قاراپ, بەلسەندٸلٸك تانىتتى.
بٸر ەرەكشەلٸگٸ, رەفەرەندۋم ناۋرىزنامانىڭ ونكٷندٸگٸمەن تۇسپا-تۇس كەلٸپ, اۋىلدا ەرەكشە مەرەكەلٸك كٶڭٸل كٷي قالىپتاستىردى. سايلاۋ ۋچاسكەسٸنٸڭ ماڭىندا تٸگٸلگەن كيٸز ٷيدە جينالعان تۇرعىندارعا ۇلتتىق تاعامدار ۇسىنىلدى. جاستار التىباقان تەۋٸپ, بالالار اسىق اتىپ, اۋىل ٸشٸ ۇلتتىق دەستٷرگە ساي دۋمانعا ۇلاستى.
«قارتى بار ٷيدٸڭ قازىناسى بار» دەمەكشٸ, اۋىلدىڭ توقساننان اسقان قارييالارى دا بۇل ماڭىزدى ناۋقاننان شەت قالمادى. 1934 جىلى دٷنيەگە كەلگەن سٷلەيمەن انداسباەۆ ٶمٸرٸنٸڭ 40 جىلىن مال دەرٸگەرٸ قىزمەتٸنە ارناپ, ەل يگٸلٸگٸ ٷشٸن ەڭبەك ەتكەن. ال بەتەن بۇلدىباەۆا اپامىز دەنساۋلىق ساقتاۋ سالاسىندا ۇزاق جىل قىزمەت اتقارعان ارداگەر مامان. عاسىردى ەڭسەرگەن قوس قارييا دا سايلاۋ ۋچاسكەسٸنە ارنايى كەلٸپ, ٶز تاڭداۋلارىن جاسادى.
بۇل – ٷلكەندەردٸڭ ەل تاعدىرىنا بەيجاي قارامايتىنىن كٶرسەتەتٸن ٶنەگەلٸ ٸس ەرٸ جاس ۇرپاققا ٷلگٸ.
وسىلايشا №157 سايلاۋ ۋچاسكەسٸندە ٶتكەن رەفەرەندۋم اۋىل تۇرعىندارىنىڭ بٸرلٸگٸ مەن ازاماتتىق بەلسەندٸلٸگٸن ايقىنداعان ماڭىزدى كٷن رەتٸندە كٶپشٸلٸكتٸڭ ەسٸندە ساقتالارى انىق.
