Abai oblysynda «Semeidiń mádeni maýsymdary» jobasy bastaldy, dep habarlaidy Dalanews.kz.
Biyl Naýryz meiramy jalpyulttyq «Naýryznama» onkúndigi aiasynda ázirlengen is-sharalar josparyna sáikes atap ótiledi. 14 naýryz – Amal merekesine orai Semei qalasyndaǵy Qaraǵaily yqsham aýdanyndaǵy respýblika alańynda «Semeidiń mádeni maýsymdary» jobasy sheńberinde «Semei kóktemi» festivali uiymdastyryldy.
Alańda sahna qurylyp, kiiz úiler tigildi. Festival teatrlandyrylǵan kórinispen bastalyp, onda úlkender men jastar kórisip, «Amal qutty bolsyn!» dep qaýyshý dástúri men alastaý rásimi kórsetildi.
Merekelik sharaǵa qatysqan oblys ákimi Berik Ýáli jinalǵan jurtshylyqty alda kele jatqan Ulystyń uly kúni – Naýryz meiramymen quttyqtady.
«Tól merekemizdi toilaýdyń mazmunyn ideologiialyq mánmen baiyta túsý úshin Memleket basshysy 2024 jyly maquldaǵan «Naýryznama» tujyrymdamasyna sáikes jańartylǵan formatta – Naýryznama onkúndigi aiasynda ótkizilýde. Bul onkúndiktiń basty maqsaty – Naýryz meiramyn tek bir kúndik dýman emes, tutas bir ulttyq jańǵyrý kezeńine ainaldyrý», – dedi aimaq basshysy.
Oblys ákimi óńirde aimaqtyń mádeni ómirine tyń serpin beretin jańa bastama «Semeidiń mádeni maýsymdary» atty aýqymdy jobanyń bastalǵanyn jariia etti.
«Atalǵan joba aiasynda óńirimizdegi mádeni sharalar jyldyń tórt mezgiline sáikes uiymdastyrylady. Iaǵni, «Semei kóktemi», «Semei jazy», «Semei kúzi», «Semei qysy» atty mádeni maýsymdar arqyly jyl boiy halqymyzdyń óneri men mádenieti jańa mazmunda nasihattalatyn bolady. Barshańyzǵa belgili, Abai atamyzdyń ózi de tórt maýsymdy jyrǵa qosyp, ataqty «Jazǵytury», «Jaz», «Kúz», «Qys», deitin tórt maýsymdy bederlegen klassikalyq óleń jazǵan bolatyn. Bizdiń «Semeidiń mádeni maýsymdary» hakim atamyzdyń osy jyrlarynan tamyr tartyp otyrǵanyn airyqsha aita ketkenimiz jón. Taǵy da bir atap óterligi, búgin ózderińiz jinalyp otyrǵan alań byltyr Respýblika kúninde paidalanýǵa berilip, Respýblika alańy dep ataý usynylǵan bolatyn. Alań tórinde búgin otanymyzdyń kók týy jelbirep, tuǵyryna kóterildi. Kók bairaǵymyz osy jerde endi únemi jelbirep turatyn bolady», – dedi Berik Ýáli.
Aimaq basshysy shara barysynda Semeidi kórkeitý baǵytyndaǵy jumystardyń qarqyndy túrde jalǵasyp, birneshe esege ulǵaiatynyn, biyl 100 aýla abattandyrylyp, osynsha aýlaǵa asfalt tóseletinin, 100 kóshege ortasha jóndeý júrgizilip, osynsha kóshe jaryqtandyrylatynyn aitty. Aita keteiik, byltyr 35 aýla abattandyrylyp, 40 aýlaǵa asfalt tóselip, 52 kóshege ortasha jóndeý jasalyp, 15 kóshe jaryqtandyrylǵan bolatyn.
Merekelik kontsertte óńir ónerpazdary men shyǵarmashylyq ujymdar óner kórsetti. Aita keteiik, «Naýryznama» tujyrymdamasyna sáikes ótkiziletin 10 kúndik aiasynda oblys boiynsha 300-den astam mádeni, áleýmettik jáne sporttyq is-shara uiymdastyrý josparlanǵan.
