اباي وبلىسىندا «سەمەيدىڭ مادەني ماۋسىمدارى» جوباسى باستالدى، دەپ حابارلايدى Dalanews.kz.
بيىل ناۋرىز مەيرامى جالپىۇلتتىق «ناۋرىزناما» ونكۇندىگى اياسىندا ازىرلەنگەن ءىس-شارالار جوسپارىنا سايكەس اتاپ وتىلەدى. 14 ناۋرىز – امال مەرەكەسىنە وراي سەمەي قالاسىنداعى قاراعايلى ىقشام اۋدانىنداعى رەسپۋبليكا الاڭىندا «سەمەيدىڭ مادەني ماۋسىمدارى» جوباسى شەڭبەرىندە «سەمەي كوكتەمى» فەستيۆالى ۇيىمداستىرىلدى.
الاڭدا ساحنا قۇرىلىپ، كيىز ۇيلەر تىگىلدى. فەستيۆال تەاترلاندىرىلعان كورىنىسپەن باستالىپ، وندا ۇلكەندەر مەن جاستار كورىسىپ، «امال قۇتتى بولسىن!» دەپ قاۋىشۋ ءداستۇرى مەن الاستاۋ ءراسىمى كورسەتىلدى.
مەرەكەلىك شاراعا قاتىسقان وبلىس اكىمى بەرىك ءۋالي جينالعان جۇرتشىلىقتى الدا كەلە جاتقان ۇلىستىڭ ۇلى كۇنى – ناۋرىز مەيرامىمەن قۇتتىقتادى.
«ءتول مەرەكەمىزدى تويلاۋدىڭ مازمۇنىن يدەولوگيالىق مانمەن بايىتا ءتۇسۋ ءۇشىن مەملەكەت باسشىسى 2024 جىلى ماقۇلداعان «ناۋرىزناما» تۇجىرىمداماسىنا سايكەس جاڭارتىلعان فورماتتا – ناۋرىزناما ونكۇندىگى اياسىندا وتكىزىلۋدە. بۇل ونكۇندىكتىڭ باستى ماقساتى – ناۋرىز مەيرامىن تەك ءبىر كۇندىك دۋمان ەمەس، تۇتاس ءبىر ۇلتتىق جاڭعىرۋ كەزەڭىنە اينالدىرۋ»، – دەدى ايماق باسشىسى.
وبلىس اكىمى وڭىردە ايماقتىڭ مادەني ومىرىنە تىڭ سەرپىن بەرەتىن جاڭا باستاما «سەمەيدىڭ مادەني ماۋسىمدارى» اتتى اۋقىمدى جوبانىڭ باستالعانىن جاريا ەتتى.
«اتالعان جوبا اياسىندا وڭىرىمىزدەگى مادەني شارالار جىلدىڭ ءتورت مەزگىلىنە سايكەس ۇيىمداستىرىلادى. ياعني، «سەمەي كوكتەمى»، «سەمەي جازى»، «سەمەي كۇزى»، «سەمەي قىسى» اتتى مادەني ماۋسىمدار ارقىلى جىل بويى حالقىمىزدىڭ ونەرى مەن مادەنيەتى جاڭا مازمۇندا ناسيحاتتالاتىن بولادى. بارشاڭىزعا بەلگىلى، اباي اتامىزدىڭ ءوزى دە ءتورت ماۋسىمدى جىرعا قوسىپ، اتاقتى «جازعىتۇرى»، «جاز»، «كۇز»، «قىس»، دەيتىن ءتورت ماۋسىمدى بەدەرلەگەن كلاسسيكالىق ولەڭ جازعان بولاتىن. ءبىزدىڭ «سەمەيدىڭ مادەني ماۋسىمدارى» حاكىم اتامىزدىڭ وسى جىرلارىنان تامىر تارتىپ وتىرعانىن ايرىقشا ايتا كەتكەنىمىز ءجون. تاعى دا ءبىر اتاپ وتەرلىگى، بۇگىن وزدەرىڭىز جينالىپ وتىرعان الاڭ بىلتىر رەسپۋبليكا كۇنىندە پايدالانۋعا بەرىلىپ، رەسپۋبليكا الاڭى دەپ اتاۋ ۇسىنىلعان بولاتىن. الاڭ تورىندە بۇگىن وتانىمىزدىڭ كوك تۋى جەلبىرەپ، تۇعىرىنا كوتەرىلدى. كوك بايراعىمىز وسى جەردە ەندى ۇنەمى جەلبىرەپ تۇراتىن بولادى»، – دەدى بەرىك ءۋالي.
ايماق باسشىسى شارا بارىسىندا سەمەيدى كوركەيتۋ باعىتىنداعى جۇمىستاردىڭ قارقىندى تۇردە جالعاسىپ، بىرنەشە ەسەگە ۇلعاياتىنىن، بيىل 100 اۋلا اباتتاندىرىلىپ، وسىنشا اۋلاعا اسفالت توسەلەتىنىن، 100 كوشەگە ورتاشا جوندەۋ جۇرگىزىلىپ، وسىنشا كوشە جارىقتاندىرىلاتىنىن ايتتى. ايتا كەتەيىك، بىلتىر 35 اۋلا اباتتاندىرىلىپ، 40 اۋلاعا اسفالت توسەلىپ، 52 كوشەگە ورتاشا جوندەۋ جاسالىپ، 15 كوشە جارىقتاندىرىلعان بولاتىن.
مەرەكەلىك كونسەرتتە ءوڭىر ونەرپازدارى مەن شىعارماشىلىق ۇجىمدار ونەر كورسەتتى. ايتا كەتەيىك، «ناۋرىزناما» تۇجىرىمداماسىنا سايكەس وتكىزىلەتىن 10 كۇندىك اياسىندا وبلىس بويىنشا 300-دەن استام مادەني، الەۋمەتتىك جانە سپورتتىق ءىس-شارا ۇيىمداستىرۋ جوسپارلانعان.
