Izrail úkimeti premer-ministr Biniamin Netaniahý qaza tapty degen aqparatty joqqa shyǵaryp, onyń shyndyqqa janaspaitynyn resmi túrde málimdedi, dep habarlaidy Dalanews.kz.
“Bul – feik jańalyq. Premer-ministrdiń jaǵdaiy jaqsy”, – dedi Premer-ministr keńsesiniń baspasóz hatshysy Omer Dostri.
Aita keteiik, keiingi kúnderi áleýmettik jelilerde Netaniahý Irannyń jaýap soqqysynan qaza tapty degen qaýeset keń tarady. Mundai áńgimelerdiń shyǵýyna 13 naýryz kúni ótken onlain-baspasóz konferentsiiasy kezinde Izrailde áýe shabýyly týraly dabyl sirenasy qosylǵanymen, onyń konferentsiia ótken jerde estilmeýi sebep bolǵan.
Sonymen qatar áleýmettik jelilerde atalǵan baspasóz máslihatyna qatysty delingen videolar taraǵan. Keibir sarapshylar bul videolardyń jasandy intellekt kómegimen jasalǵan bolýy múmkin ekenin aitqan. Osyndai materialdardyń taralýy Netaniahý qaza tapty degen qaýesettiń kúsheiýine sebep bolǵan.
Budan bólek, jelide Resei, Qytai jáne Soltústik Koreiamen bailanysy bar delingen keibir akkaýnttar “Netaniahýdyń ólimi rastaldy” degen jazbalar jariialaǵan.
Sondai-aq jelide “Netaniahý qaitys boldy” degen jazýy bar túrli skrinshot ta tarap, qyzý talqyǵa tústi.
Alaida Izrail premer-ministriniń keńsesi bul málimetterdiń barlyǵy shyndyqqa sáikes kelmeitinin málimdedi. Keńseniń áleýmettik jelidegi paraqshasynda jariialanǵan habarlamada azamattardy tek resmi ári tekserilgen aqparatqa senýge shaqyrǵan.
Onda premer-ministrdiń qyzmetin jalǵastyryp jatqany jáne el qaýipsizdigine qatysty jumystardy júrgizip otyrǵany aitylǵan.
