يزرايل ۇكىمەتى پرەمەر-مينيستر بينيامين نەتانياحۋ قازا تاپتى دەگەن اقپاراتتى جوققا شىعارىپ، ونىڭ شىندىققا جاناسپايتىنىن رەسمي تۇردە مالىمدەدى، دەپ حابارلايدى Dalanews.kz.
“بۇل – فەيك جاڭالىق. پرەمەر-مينيستردىڭ جاعدايى جاقسى”، – دەدى پرەمەر-مينيستر كەڭسەسىنىڭ باسپا ءسوز حاتشىسى ومەر دوستري.
ايتا كەتەيىك، كەيىنگى كۇندەرى الەۋمەتتىك جەلىلەردە نەتانياحۋ يراننىڭ جاۋاپ سوققىسىنان قازا تاپتى دەگەن قاۋەسەت كەڭ تارادى. مۇنداي اڭگىمەلەردىڭ شىعۋىنا 13 ناۋرىز كۇنى وتكەن ءونلاين-باسپاسوز كونفەرەنسياسى كەزىندە يزرايلدە اۋە شابۋىلى تۋرالى دابىل سيرەناسى قوسىلعانىمەن، ونىڭ كونفەرەنسيا وتكەن جەردە ەستىلمەۋى سەبەپ بولعان.
سونىمەن قاتار الەۋمەتتىك جەلىلەردە اتالعان باسپا ءسوز ءماسليحاتىنا قاتىستى دەلىنگەن ۆيدەولار تاراعان. كەيبىر ساراپشىلار بۇل ۆيدەولاردىڭ جاساندى ينتەللەكت كومەگىمەن جاسالعان بولۋى مۇمكىن ەكەنىن ايتقان. وسىنداي ماتەريالداردىڭ تارالۋى نەتانياحۋ قازا تاپتى دەگەن قاۋەسەتتىڭ كۇشەيۋىنە سەبەپ بولعان.
بۇدان بولەك، جەلىدە رەسەي، جۇڭگو جانە سولتۇستىك كورەيامەن بايلانىسى بار دەلىنگەن كەيبىر اككاۋنتتار “نەتانياحۋدىڭ ءولىمى راستالدى” دەگەن جازبالار جاريالاعان.
سونداي-اق جەلىدە “نەتانياحۋ قايتىس بولدى” دەگەن جازۋى بار ءتۇرلى سكرينشوت تا تاراپ، قىزۋ تالقىعا ءتۇستى.
الايدا يزرايل پرەمەر-مينيسترىنىڭ كەڭسەسى بۇل مالىمەتتەردىڭ بارلىعى شىندىققا سايكەس كەلمەيتىنىن مالىمدەدى. كەڭسەنىڭ الەۋمەتتىك جەلىدەگى پاراقشاسىندا جاريالانعان حابارلامادا ازاماتتاردى تەك رەسمي ءارى تەكسەرىلگەن اقپاراتقا سەنۋگە شاقىرعان.
وندا پرەمەر-مينيستردىڭ قىزمەتىن جالعاستىرىپ جاتقانى جانە ەل قاۋىپسىزدىگىنە قاتىستى جۇمىستاردى جۇرگىزىپ وتىرعانى ايتىلعان.
