Kóneden kele jatan dástúrli ánderimizdi el aýzynan tirnektep jinap, urpaqqa amanattaǵan Aleksandr Zataevich qazaq halqynyń án-kúiine tánti bolǵanda aitqan «Qazaq dalasy án salyp turǵandai» degen sózi bárimizdiń kókeimizde sairap tur. Ǵaiyptan taiyp, myńbolǵyr Aleksandr Viktorovich bir qudirettiń kúshimen qazirgi zamanǵa qaita oralsa, qazaq estradasynyń qulaq tundyratyn áni men biin, telearnalardaǵy án sherýlerdi kórip teńeý taba almai qatty qinalar ma edi, qaiter edi?! Óitkeni, qazir keń saharanyń árbir sai-salasy, jyra-jyqpyly, oi-shuńqyry kúndiz-túni damyl tappai án salyp tur.
Telearnany qossań, alqyn-julqyn bilep, án aitqan ánshige tap bolasyń. Biz mundai kúige qalai tap boldyq? Súreńsiz ómirimizdiń ózi shoýǵa ainalyp bara jatqanyn kórgende eriksiz muńaiasyń. Saraptamalyq baǵdarlamalardyń arasynda án aitylǵannan keiin, ne deýge bolady. Taiaýda «Habar» arnasynda «Juldyzdy aitys» degen joba dúrkirep ótti. Bizdińshe, bul aitysty nasihattaý emes, qorlaý boldy. Shoýdyń siqyrly sazyna eltigen televiziialyq prodiýsserlerdiń saýyqshyl jurttyń nazaryn ózderine aýdarý úshin jasaǵan kezekti «ádisi» ekenin túsinemiz. Oǵan qatysqan ártisterdi qoiyńyzshy, «Juldyzdy aitysqa» dombyrasyn arqalap kelip, támam jurttyń kózinshe ózderin ózderi masqaralaǵan aitysker aqyndar úshin uialdyq. Aitpaǵymyz bul emes, odan da soraqy dúnielerdi kórip júrgen kóz ǵoi, nesine tańyrqaiyq! Kezinde «Habar» arnasynan osyndai talai jobanyń tusaýyn kesken Serik Abas-Shahtyń «feisbýk» paraqshasyna jazǵan myna bir posty bizdi qatty tańqaldyrdy. Endi sol posty keltirsek.
«Juldyzdy aitys» igi-jaqsyny da, qalyń jurtty da jyndy qyldy.
«Laqpany» laiyqsyz kórgender renishin basa almai otyr.
«Laqqandardyń» raidan qaitar túri joq.
«Juldyzdar aitysady» jobasy efirde «jyndylar aitysady» bolyp shyqty. Qyljaqpastar men ánshibastar arqyly «aitys jarnamalandy, jurt oǵan nazar aýdara bastady» dep aqtalyp jatqandar bar. Durys tásil eken. Onda meshitterdiń qabyrǵalaryna «Keshiý» tobyndaǵy qyzdardyń qysqa shortik kigen fotosyn ilip qoiyńdar. Juma namazdy Nurlan Espanov pen Nurlan Abdýllinge oqytyńdar. Janaza shyǵarýǵa KVN oiynshylary barsyn. Aptasyna bir ret (meshit ishinde) Qairat Nurtastyń kontsertin uiymdastyryńdar. Shoýdyń «kókesi» osy. Musylmandyqty nasihattaýdyń «kókesi» osy. Budan keiin jastardyń bári meshitten shyqpaityn bolady».
Sekeń syn sadaǵyna jii alatyn inisi Nurlan Espanov men Nurlan Abdýlin Astana men Almatydaǵy áidik meshitterde azan aitýy úshin ary-beri ushyp júretin kúnge de jetermiz (Inshalla). Kim bilsin?
Sekeńniń kezinde «Habarda» ánshiler jýrnalisterdiń ornyn basyp, túrli habarlardy júrgizgenine kýá boldyq. Baǵdarlamany qoiyńyzshy, tikelei efirdiń ózin ánshilerge «senip» tapsyrdyq qoi. Nátijesi qandai bolǵanyn Mádina Sádýaqasovanyń Aziadany júrgizgen kezin eske alsaq jetip jatyr. Qazir ánshi, ártister telearnadaǵy jýrnalisterdiń ornyn tolyqtai basyp alǵan. Baǵdarlama bitkenniń bári ánshilersiz ótpeidi. Bul az deseńiz, sońǵy ýaqyttary ánshi-ártister jýrnalistika fakýltetiniń magistratýrasyna túsip alyp, shetinen jýrnalist atanyp jatyr. Erteńgi kúni olardyń bári qolynda qujaty bar jýrnalist bolady. Sol kezde ánshiler meshittegi imamdardyń orynyn tartyp almasa da, telearnalardy kásibi jýrnalisterden tazartatyny anyq. Muny birinshi bolyp Sekeńniń sezýi de oryndy. Amal joq, óz qolyńdy óziń kese almaisyń.
Nurlan ÁÝBÁKIR
