Biyl Túrkistan oblysynda 896 myń gektarǵa aýyl sharýashylyǵy daqyldaryn egý josparlanǵan. Bul ótken jylmen salystyrǵanda 26 myń gektarǵa artyq,dep habarlaidy Dalanews.kz
Oblys ákimi apparatynyń aptalyq májilisinde alqaptardy aǵyn sýmen qamtý máselesi talqylandy.
Túrkistan oblysynyń ákimi Nuralhan Kósherov jaýapty basshylarǵa osy saladaǵy jumysty jandandyryp, diqandarǵa qoldaý kórsetý jóninde tapsyrma berdi.
– Oblysymyz úshin aýyl sharýashylyǵynyń mańyzy óte joǵary. Aǵyn sý berý maýsymynda sýdyń josparlanǵan limitiniń tolyq ári merziminde berilýin qamtamasyz etýdi tapsyramyn. Oblys aýmaǵyndaǵy aǵyn sý nysandarynyń qazirgi jaǵdaiyna turaqty monitoring jumystaryn júrgizińizder. «Aýyl amanaty» baǵdarlamasy aiasynda sý únemdeý tehnologiialaryn engizgen jón. Aǵyn sýdan tapshylyq bolmaýy úshin mindetterińizdi sapaly atqaryńyzdar, – dedi Nuralhan Kósherov.
Oblystyq aýyl sharýashylyǵy basqarmasynyń basshysy Faizýlla Baidýllaevtyń aitýynsha, jazdyq daqyldardy egý jumystary qarqyndy júrgizilýde. Sýarmaly egistik jerlerin aǵyn sýmen qamtamasyz etýge jyl saiyn 4,9 mlrd. m3 aǵyn sý limiti bekitiledi. Degenmen sońǵy jyldarda iri investitsiialyq jobalardyń iske asyrylýyna bailanysty oblysqa naqty qajettilik 5,8 mlrd. tekshe metrge jetýde. Sý qoimalarda jinalǵan sý kólemi jaqsy deńgeide, ortasha eseppen 71 paiyzdy qurap otyr. Onyń ishinde «Shardara» sý qoimasy 87 paiyzǵa tolǵan. Qazirgi tańda «Qyzylqum» magistraldy kanaly arqyly Shardara aýdanyna sor shaiý jumystaryna 125 m3/sek aǵyn sý bosatylýda. Egistikke qajetti aǵyn sý kólemi sharýalardyń suranysyna sáikes bosatylyp, vegetatsiialyq maýsym qalypty deńgeide bastalǵan. Oblysqa qajetti aǵyn sýdyń 63%-y kórshi memleketterdiń aýmaǵynan keledi. Úkimetaralyq deńgeide bekitilgen 1116 mln. m3 aǵyn sý kestege sáikes bosatylyp jatyr.
Aita keteiik, byltyr Túrkistan óńirinde oblystyq biýdjet esebine 43 shaqyrymdy quraityn 11 sý nysanyna kúrdeli jóndeý jumystary bastaldy. 1350 shaqyrym qashyrtqyǵa mehanikalyq tazalaý jumystary júrgizildi. Nátijesinde 2,9 myń gektar jer sýmen qamtamasyz etilip, 26,9 myń gektar aýmaqtyń meliorativtik jaǵdaiy jaqsarǵan. 2025 jylǵa 5,4 mlrd. teńge qarjy qaralyp, 59 shaqyrymdy quraityn 12 sý nysanyna kúrdeli jóndeý, 21,8 shaqyrymdy quraityn qashyrtqylarǵa (1 joba) mehanikalyq tazalaý jumystary bastaldy. Osy arqyly 7,7 myń gektar jerdiń aǵyn sýmen qamtamasyz etý jaǵdaiy jaqsarady.
Sý nysandaryn «Islam damý banki» qarjysyn tartý esebinen qalpyna keltirý sharalary atqarylýda. Alǵashqy kezeńge «Turan sý» kásiporny arqyly 14 joba qarjylandyrylyp, 166 shaqyrym kanal betonmen qaptalyp, 53,3 myń ga sýarmaly jerdiń sý jetkizý qabilettiligi artady. Sonymen qatar kommýnaldyq menshiktegi 10 sý nysanyn «Qazsýshar» RMK-niń teńgerimine berý arqyly «Islam damý bankimen» qarjylandyrý kózdelgen. Nátijesinde 130 shaqyrym kanal betonmen qaptalyp, 10,1 myń ga jerdiń aǵyn sýmen qamtamasyz etilýi jaqsarady. Ekinshi kezeń boiynsha 120 jobaǵa jáne «Qazsýshar» RMK TF arqyly 157 jobaǵa JSQ ázirlenýde. Búgingi tańda, 14 jobanyń JSQ-sy daiyn. Jalpy 25 sý qoima, 1 sý rettegish, 269 kanaldy (4265,4 shaqyrym) kúrdeli jóndeýden ótkizý josparlanyp otyr.
