Jol politsiiasynyń kólikterdi sebepsiz toqtatýynyń jiileýi qoǵamda úlken suraq týǵyzdy. Tanymal jýrnalist, qoǵam belsendisi Gúlbaný Ábenova óziniń basynan ótken oqiǵany baiandap, tártip saqshylarynyń negizsiz áreketine narazylyǵyn jetkizdi, dep habarlaidy Dalanews.kz.
«Keshki segizden keiin Aqmol aýylynan shyǵa bere trassa boiynda jol saqshysy maǵan toqtaýdy buiyrdy. Artymdaǵy kólikti de birden toqtatty. Ekeýimiz de toqtadyq. Politsiia qyzmetkeri janyma keldi, amandastym, ol basyn izedi, biraq aty-jónin ataǵan joq. Zań boiynsha ózin tanystyrýǵa mindetti emes pe edi? Álde tártip ózgerdi me? Qazir zańdarymyz elordanyń aýa raiyndai tez ózgeredi, esh turaqtylyq joq», – dep jazdy jýrnalist áleýmettik jelidegi paraqshasynda.
Jýrnalist toqtatý sebebin suraǵanda, politsiia qyzmetkeri eshteńe túsindirmesten, «júre berińiz» depti. Bul oqiǵa Ábenova hanymdy da, qoǵamdy da oilandyrdy: «Qazir kólikterdi sebepsiz toqtatýǵa ruqsat beretin zań qabyldandy ma?».
Qazaqstan Respýblikasynyń «Jol júrisi týraly» Zańynyń 52-babynda politsiia qyzmetkerleriniń kólikti toqtatýǵa naqty sebepteri kórsetilgen. Bul tizimde sebepsiz toqtatýǵa ruqsat etilmeidi.
«Eshqandai erejeni buzǵan joqpyn, jolǵa endi shyqtym, esh negizsiz toqtatty. Sonda munyń sebebi nede? Jol politsiiasy basqarmasy túsinikteme bersin. Qyzmetkerlerdiń ózin tanystyrý mindeti áli bar ma? Eger politsiia zańsyz áreket etse, qandai sharalar qoldanylady?» – dep surady Ábenova.
Jýrnalistiń jazýynsha, sońǵy kezde kóptegen azamattar jol politsiiasynyń sebepsiz toqtatýyna tap bolýda. Politsiia qyzmetkerleri kólikti toqtatyp, ne qujat teksermeidi, ne zańdy sebepterin aitpaidy, «júre berińiz» dep qaita jiberetin jaǵdailar kóbeigen.
«Jol politsiiasynyń negizgi mindeti – joldaǵy qaýipsizdikti qamtamasyz etý bolsa, onda nege joldardyń sapasyna dál osyndai belsendilik tanytpaidy? Máselen, Aqmol aýyly astanadan nebári 36 shaqyrym jerde, biraq joly shuryq-tesik, apatqa ákeletin jaǵdai kóp. Politsiia soǵan nege mán bermeidi? Álde tártip saqshylarynyń basty maqsaty júrgizýshilerdi sebepsiz toqtatyp, aiyppul salý nemese para alý ma?» – deidi Gúlbaný Ábenova.
Avtor sonymen qatar politsiia qyzmetkerleriniń videojetonsyz jumys isteitin kezderi de jiilegenin atap ótti. Oǵan «jetonnyń batareikasy otyryp qaldy» dep aqtalady eken.
«Munyń artynda ne tur? Ishki ister ministrligi buǵan naqty jaýap berýi kerek. Ákimshilik politsiia basshylyǵy ún qatpasa, máseleni ministrdiń ózine jetkizýge májbúr bolamyn», – dep túiindedi jýrnalist.
