جول پوليسياسىنىڭ كولىكتەردى سەبەپسىز توقتاتۋىنىڭ جيىلەۋى قوعامدا ۇلكەن سۇراق تۋعىزدى. تانىمال جۋرناليست، قوعام بەلسەندىسى گۇلبانۋ ابەنوۆا ءوزىنىڭ باسىنان وتكەن وقيعانى بايانداپ، ءتارتىپ ساقشىلارىنىڭ نەگىزسىز ارەكەتىنە نارازىلىعىن جەتكىزدى، دەپ حابارلايدى Dalanews.kz.
«كەشكى سەگىزدەن كەيىن اقمول اۋىلىنان شىعا بەرە تراسسا بويىندا جول ساقشىسى ماعان توقتاۋدى بۇيىردى. ارتىمداعى كولىكتى دە بىردەن توقتاتتى. ەكەۋىمىز دە توقتادىق. پوليسيا قىزمەتكەرى جانىما كەلدى، امانداستىم، ول باسىن يزەدى، ءبىراق ءاتى-جونىن اتاعان جوق. زاڭ بويىنشا ءوزىن تانىستىرۋعا مىندەتتى ەمەس پە ەدى؟ الدە ءتارتىپ وزگەردى مە؟ ءقازىر زاڭدارىمىز ەلوردانىڭ اۋا رايىنداي تەز وزگەرەدى، ەش تۇراقتىلىق جوق»، – دەپ جازدى جۋرناليست الەۋمەتتىك جەلىدەگى پاراقشاسىندا.
جۋرناليست توقتاتۋ سەبەبىن سۇراعاندا، پوليسيا قىزمەتكەرى ەشتەڭە تۇسىندىرمەستەن، «جۇرە بەرىڭىز» دەپتى. بۇل وقيعا ابەنوۆا حانىمدى دا، قوعامدى دا ويلاندىردى: «ءقازىر كولىكتەردى سەبەپسىز توقتاتۋعا رۇقسات بەرەتىن زاڭ قابىلداندى ما؟».
قازاقستان رەسپۋبليكاسىنىڭ «جول ءجۇرىسى تۋرالى» زاڭىنىڭ 52-بابىندا پوليسيا قىزمەتكەرلەرىنىڭ كولىكتى توقتاتۋعا ناقتى سەبەپتەرى كورسەتىلگەن. بۇل تىزىمدە سەبەپسىز توقتاتۋعا رۇقسات ەتىلمەيدى.
«ەشقانداي ەرەجەنى بۇزعان جوقپىن، جولعا ەندى شىقتىم، ەش نەگىزسىز توقتاتتى. سوندا مۇنىڭ سەبەبى نەدە؟ جول پوليسياسى باسقارماسى تۇسىنىكتەمە بەرسىن. قىزمەتكەرلەردىڭ ءوزىن تانىستىرۋ مىندەتى ءالى بار ما؟ ەگەر پوليسيا زاڭسىز ارەكەت ەتسە، قانداي شارالار قولدانىلادى؟» – دەپ سۇرادى ابەنوۆا.
ءجۋرناليستىڭ جازۋىنشا، سوڭعى كەزدە كوپتەگەن ازاماتتار جول پوليسياسىنىڭ سەبەپسىز توقتاتۋىنا تاپ بولۋدا. پوليسيا قىزمەتكەرلەرى كولىكتى توقتاتىپ، نە قۇجات تەكسەرمەيدى، نە زاڭدى سەبەپتەرىن ايتپايدى، «جۇرە بەرىڭىز» دەپ قايتا جىبەرەتىن جاعدايلار كوبەيگەن.
«جول پوليسياسىنىڭ نەگىزگى مىندەتى – جولداعى قاۋىپسىزدىكتى قامتاماسىز ەتۋ بولسا، وندا نەگە جولداردىڭ ساپاسىنا ءدال وسىنداي بەلسەندىلىك تانىتپايدى؟ ماسەلەن، اقمول اۋىلى استانادان نەبارى 36 شاقىرىم جەردە، ءبىراق جولى شۇرىق-تەسىك، اپاتقا اكەلەتىن جاعداي كوپ. پوليسيا سوعان نەگە ءمان بەرمەيدى؟ الدە ءتارتىپ ساقشىلارىنىڭ باستى ماقساتى جۇرگىزۋشىلەردى سەبەپسىز توقتاتىپ، ايىپپۇل سالۋ نەمەسە پارا الۋ ما؟» – دەيدى گۇلبانۋ ابەنوۆا.
اۆتور سونىمەن قاتار پوليسيا قىزمەتكەرلەرىنىڭ ۆيدەوجەتونسىز جۇمىس ىستەيتىن كەزدەرى دە جيىلەگەنىن اتاپ ءوتتى. وعان «جەتوننىڭ باتارەيكاسى وتىرىپ قالدى» دەپ اقتالادى ەكەن.
«مۇنىڭ ارتىندا نە تۇر؟ ىشكى ىستەر مينيسترلىگى بۇعان ناقتى جاۋاپ بەرۋى كەرەك. اكىمشىلىك پوليسيا باسشىلىعى ءۇن قاتپاسا، ماسەلەنى ءمينيستردىڭ وزىنە جەتكىزۋگە ءماجبۇر بولامىن»، – دەپ تۇيىندەدى جۋرناليست.
