Jazbaýǵa, jariialamaýǵa kelmei tur endi. Óz tarapymyzdan úndemestigimizdiń kesirin tarttyq. Jýrnalister adam emes pe osy? Olardyń da otbasylary, bala-shaǵasy bar emes pe?
Alǵash qysqartý bolady delingen. «Birshama qyzmetkerler jumyssyz qalady» degen sóz shyqty. Sonda da asa alańdamaǵan edik. Endi mine, «Qazaqstan ulttyq telearnasynyń «Qazaqstan-Semei» filialy jabylsyn!» degen buiryq shyǵypty. Bizdiń ujymda 70 adam isteidi, demek, «jabylsyn» degen sóz osy 70 adam jumyssyz qalady degendi bildiredi.
Sebebin de bildik. Álemdik daǵdarys, qarjyny únemdeý depti. Qyzyq, memleket qarjyny jýrnalisterdiń esebinen únemdegeni nesi? Únemdeýdi aldymen ózinen bastamai ma?
Bir qyzyǵy, kishigirim zaýyttaǵy 70 adam jumyssyz qaldy dese, bul – tragediia. Al 70 jýrnalist (árine, onyń ishine operatorlar, redaktorlar, basqa da mamandyq ieleri kiredi) jumyssyz qalsa, eshkimniń júregi aýyrmaityn siiaqty.
Sonda jýrnalister adam emes pe? Semei – Almaty emes, jumyssyz qalsaq, biz anda-myna kire kete almaimyz. Bizdiń esebimizden únemdeitindei ailyǵymyz da asyp-tasyp turǵan joq edi. 60 myńnyń ainalasynda alamyz. Qazirgi baǵamǵa shaqsaq, bar bolǵany 200 dollardan sál asady. Sonda bizdiń esebimizden qai qarjyny únemdemek?
Jaraidy, bul basqa másele. Eger «Qazaqstan-Semei» telearnasy jumys istemei otyrsa, telearna túsirgen dúnielerdi el kórmese, bilmese biz de úndemes edik. Biraq, osy arnanyń otymen kirip, kúlimen shyǵyp júrmiz. Respýblikalyq bolmasa da, aimaqtyq deńgeide halyqqa habar taratyp otyrǵan jaiymyz bar.
Iá, ras úndemestigimizdiń kesirin tarttyq. Qolymyzdy kesh sermedik pe dep qorqamyz. Biraq, «eshten kesh jaqsy». Memleket únemdeýdi qysqartýdyń esebinen júrgizip jatqany tańǵaldyrady. Qysqartýdyń arty jumyssyzdyq. Al onyń arty ne?
Berik TENTEKULY
Redaktsiiadan: «Qazaqstan-Semei telearnasynyń jabylýyna qarsylyq bildirgen telearna ujymy Memleket basshysy Nursultan Nazarbaevtyń atyna hat jazypty. Sol hatty qaz-qalpynda berip otyrmyz.
Qurmetti, Nursultan ÁBIShULY!
Sizge «Qazaqstan» ulttyq telearnasynyń Semei qalasyndaǵy filial qyzmetkerleri hat jazyp otyr. «Aqsha únemdeimiz» degen ulttyq arna basshylyǵy «Qazaqstan-Semei» telearnasy jabylsyn!» degen sheshim shyǵarypty.
Al Semeidiń ózi Qazaqstannyń rýhani-mádeni ortalyǵy. Abai men Shákárim dúniege kelgen jer. Dál osy jerde Sizdiń qoldaýyńyzben «Nevada-Semei» antiiadrolyq qozǵalysy qurylǵan. Bastysy Sizdiń bastamalaryńyz ben reformalaryńyzdy nasihattaýdy bizdiń ujym eshqashan da kún tártibinen túsirgen emes.
Qazir Semei qalasynda 350 myńnan asyp jyǵylatyn halyq turady. Osy 350 myń adam qalanyń kúndelikti tynys-tirshiligin, ondaǵy oryn alyp jatqan oqiǵalardy bizdiń telearna arqyly biledi.
Qazirgi kúni ujymda 70 adam qyzmet atqaryp jatyr. Az emes. Barlyǵynyń otbasy, bala-shaǵasy bar. Arnanyń qarjylyq áleýeti sonshalyqty qomaqty emes, bastysy jańalyqtar túsirýge, baǵdarlamalar ázirleýge qajetti barlyq tehnikalar bar.
Saiyp kelgende «únemdeimiz» dep 300 myń aýditoriiaǵa arnalǵan aimaqtyq arnany jabý qisynsyz. Bul tyǵyryqtan shyǵýdyń joly emes. Onyń ústine «Qazaqstan-Semei» telearnasy ózine qajetti qarjynyń biraz bóligin óz kúshimen tabady. Atap aitqanda memlekettik tapsyrystardy oryndaimyz, jarnamalar shyǵaramyz.
Semei strategiialyq aimaqta ornalasqan. Bergi jaǵymyzda Resei, arǵy jaǵymyzda Qytai. Bul turǵydan qarastyrǵanda ekonomikalyq jaǵdaiǵa obektivti túrde baǵa beretin, jergilikti memlekettik qurylymdardyń atqaryp jatqan jumysyn júieli túrde jurtqa jetkizip otyratyn, eń bastysy elge qalanyń rýhani-mádeni jáne áleýmettik ómirinen habar beretin arnanyń jabylýy qatelik dep sanaimyz.
Telearna ujymy atalǵan másele Memleket basshysy retinde ózińizdi aralasýyńyzdy jáne «Qazaqstan» ulttyq arnasynyń basshylyǵy tarapynan qabyldanǵan «Qazaqstan-Semei» filialy jabylsyn degen sheshimniń kúshin joiýdy suraimyz.
Nege deseńiz, bul Semei qalasyndaǵy jalǵyz memlekettik telearna. Al memlekettik arnanyń jabylýy tutastai alǵanda memlekettiń aqparattyq saiasatyna keri áser etýi múmkin.
Qurmetpen, «Qazaqstan-Semei» telearnasynyń ujymy
