Qyryq jyl boiy kúrdeli jóndeý kórmegen Semeidiń áýejaiy 2018 jyldyń birinshi jartysynda tolyq iske qosylady. Bul týraly Shyǵys Qazaqstan oblysynyń ákimi Danial Ahmetov jumys sapary barysynda málim etti.
Qazirgi tańda ushyp-qoný jolaǵy jańartyldy. Jumys kestege sai qyzý júrip jatyr. Jyl basynan 4,8 mlrd teńge igerilgen.
– Az ýaqyt buryn kúrdeli isti qolǵa aldyq. Endi keler jyldyń maýsymynan bastap semeilikter ǵana emes, jaqyn mańdaǵy aýdan turǵyndary da joǵary qaýipsizdik talaptaryna tolyq jaýap beretin áýejaidan ushý múmkindigine ie bolady. Bul jer sondai-aq, qaladaǵy mańyzdy infraqurylym qataryn tolyqtyrady. Oǵan senim zor, – dedi aimaq basshysy.
Danial Ahmetov áýejai tolyq jóndelgennen keiin ushý geografiiasy artatynyn aitty. Tarih taǵlymynda oiyp turyp oryn alar Semei úshin bul týrister tartýǵa mol múmkindik bereri sózsiz.
Kezekti jumys sapary barysynda qaladaǵy sony ózgeristerdi Shyǵys Qazaqstan oblysynyń ákimi Danial Ahmetov barynsha baǵamdady. Biyl Semeidiń joldarynda orta jóndeý jumystary qyzý júrgizildi. 23 shaqyrym qashyqtyqqa asfalt tóselip, 8 ortalyq kóshe jańartyldy.
Jol tósenishin salý úshin 1 mlrd. 260 million teńge bólindi. Ótken jylmen salystyrǵanda qarajat kólemi 78 paiyzǵa eselengen. Onyń ishinde orta jóndeý jumystaryna 900 millionnan astam qarajat, 70 kóshedegi aǵymdaǵy jumystarǵa 290 million teńge jumsaldy.
– Ótken kóktemde joldar jasalynady dep aitqan edik. Nátijeni kórip tursyzdar. 23 shaqyrym jol jóndeldi. Bir jazdyń ishinde osynsha joldy qalpyna keltirý jumystary Semeide qashan júrgizilip edi? – dedi oblys ákimi.
Danial Ahmetov sondai-aq, kelesi jyly qalanyń taǵy 25 shaqyrym jolyna asfalt tóselip, abattandyrý jumystary jalǵasatynyn aitty. Aita ketý kerek, aldaǵy bes jylda Semeidiń infraqurylym jelisi de jaqsartylyp, jańartylady.
Shyǵys Qazaqstan oblysynyń ákimi Danial Ahmetov Semei qalasyndaǵy is-sapary barysynda óńirdegi eń mańyzdy densaýlyq saqtaý nysandarynyń birinde boldy. Ókinishke orai, mekeme jabdyqtalýynda ketken kemshilikter kesirinen áli kúnge deiin iske qosylmai tur.
Kezekti tekserý kezinde suiyq radioaktivti qaldyqtardy saqtaýǵa arnalǵan jabdyqtyń Shymkenttegi kásiporyndardyń birinde ázirlengeni anyqtaldy. Al joba boiynsha ol Germaniiadan alynýy tiis edi. Osylai, sapasy talapqa sai emes jabdyq – kúnniń basty problemasy bolyp otyr. Iske jaýapsyz kelgender qatarynda qurastyrý júrgizgen kásiporyn da bar. Onyń radioaktivti zattarmen jumys júrgizýge tipti ruqsat qaǵazy bolmaǵan. Jyry bitpegen mekemedegi jaǵdaidy kezekti ret synǵa alǵan aimaq basshysy máseleni túbegeili sheshýdi tapsyrdy.
– Litsenziia mindetti túrde bolýy tiis. Biraq ony eshkim teksermegen. Al jabdyq bolsa, talapqa sai emes. Biz úshin halyqtyń qaýipsizdigi birinshi orynda, sondyqtan ony mindetti túrde aýystyramyz, – dedi oblys ákimi Danial Ahmetov.
Aimaq basshysynyń tapsyrmasyna sai, qazirgi tańda iadrolyq ortalyqtaǵy olqylyqtyń ornyn toltyryp, problemany sheshýdiń birneshe joly qarastyrylýda.
ShQO ákiminiń baspasóz qyzmeti
https://dalanews.kz/30258
