Aziia Damý bankiniń (ADB) sarapshylary 2025 jyly Qazaqstannyń jalpy ishki óniminiń (JIÓ) ósimi 4,9%, al 2026 jyly 4,1%-ǵa deiin baiaýlaidy dep boljaidy. Bul týraly Asian Development Outlook-tiń sáýir aiyndaǵy basylymynda derekter keltiriledi, dep habarlaidy Dalanews.kz.
2025 jyly Qazaqstannyń ekonomikalyq ósiminiń jedeldeýine Teńizdegi Future Growth Expansion jobasyn iske qosý nátijesinde kútiletin munai óndirisiniń ulǵaiýy túrtki ekeni kórsetiledi. Al 2026 jyly ósim qarqynynyń baiaýlaýyna birqatar ózgeristerdi qamtityn salyq saiasatynyń kúshine enýi jáne biýdjet shyǵystarynyń qysqarýy sep bolmaq. Al týyndaýy múmkin jaǵymsyz saldarǵa jahandyq tegeýirinder, sondai-aq munai eksporty jetkizilimine qatysty yqtimal buzylystar jatqyzylady.
"Qazaqstan ekonomikasy turaqty ósimdi kórsetip otyr. Osy ósim qarqynyn saqtaý úshin memlekettik qarjyny basqarý júiesin nyǵaitý jáne Ulttyq qorǵa táýeldilikti azaitý úshin biýdjettik basqarý sapasyn arttyrý mańyzdy. Jeke sektordy damytý úshin qolǵa alynyp jatqan bul sharalar qurylymdyq reformalarmen qatar ekonomikalyq syrtqy kúizelisterge tótep berý qabiletin de qairai túseidi", - dep atap ótti ADB-nyń Qazaqstandaǵy ókildiginiń direktory Ýtsav Kýmar.
2025 jyly infliatsiia birtindep 8,2%-ǵa deiin, al 2026 jyly 6,5%-ǵa deiin tómendeitini boljanady. Óitkeni qatań aqsha-nesie saiasaty men turaqty valiýta baǵamy baǵa ósimin tejeýshi faktorǵa ie bola alady.
Biýdjet tapshylyǵy shamaly artady dep boljanady: 2025 jyly JIÓ-niń 2,8%-na deiin. Al 2026 jyly, kerisinshe 1,7%-ǵa deiin qysqarady. Buǵan Úkimet usynysy qabyldanyp, QQS mólsheriniń ósýi jáne salyq jeńildikter sanynyń azaiýy yqpal etpek. Aǵymdaǵy shot tapshylyǵy munai óndirisi kóleminiń ulǵaiýy esebinen taýar eksporty kóleminiń artýyna bailanysty qysqarady dep kútiledi.
Bul boljam 2 sáýirde AQSh ákimshiliginiń jańa tarifterdi engizetinin jariialaǵanǵa deiin ázirlengeni eskertiledi. Sondyqtan bul bazalyq stsenarii buǵan deiingi qoldanystaǵy tarifterdi eskergeni de naqtylanady.
Aita ketsek, Qazaqstan 1994 jyly ADB múshesi boldy. Sodan beri bank jalpy somasy 7,5 mlrd dollardan asatyn nesieler, granttar berip, memlekettik sektordy basqarý, qarjy, energetika, kólik jáne basqa da salalarǵa tehnikalyq kómek kórsetti.
