Májilis otyrysynda jańa Salyq kodeksi talqylanyp jatyr. Májilis depýtaty Nartai Sársenǵaliev bul ózgerister BAQ ókilderine úlken aýyrtpalyq ekenin málimdedi, – dep habarlaidy Dalanews.kz.
Depýtattyń málimdemesi
Depýtattyń málimdemesi
"Qazir aqparattyq soǵys álemde qalai júrip jatqanyn, ár el aqparattyq turǵyda óz-ózin qalai qaýipsizdendirýge tyrysyp jatqanyn jaqsy bilemiz. Sondyqtan qosymsha qun salyǵy buqaralyq aqparat quraldaryna 16%-ǵa jetetin bolsa, sáikesinshe bul bizdiń elimizdegi buqaralyq aqparat quraldarynyń ózimizdiń ishtegi azamattarymyzǵa, otandastarymyzǵa qajet jobalar jasaýyna, qajet dúnielerdi joldaýyna iaki básekelestik qabilettiligine keri áser etedi. Sáikesinshe sheteldik buqaralyq aqparat quraldary elimizde qaptaidy jáne sheteldik jobalar bizdiń teleekrannan da, radiodan da, internetten de túspeidi degen sóz. Bul - úlken qaýip", - dedi ol.
Depýtat bul másele gazet-jýrnaldy da ainalyp ótpeitinin jetkizdi.
"Bizde oblystyq, aýdandyq, qalalyq gazet-jýrnaldar bar. Ol jerdegi áriptesterimiz onsyzda kip-kishkentai ailyqqa ildildálap áreń kúnin kórip otyr. Eger olarǵa salynatyn qosymsha qun salyǵy 16%-ǵa baratyn bolsa, onda kóbi jabylyp tynady. Sáikesinshe aimaqtar tiisti aqparat quralynsyz qalady, azamattar, áriptes jýrnalisterimiz jumyssyz qalady", - dedi ol.
Nartai Sársenǵaliev mańyzdy eki usynys joldady.
"Birinshisi, elimizdegi otandyq gazet-jýrnaldarǵa qosymsha qun salyǵyn alyp tastaý iaki nól paiyz qylý. Ekinshi elimizdegi otandyq resmi tirkelgen telearnalar men radiolarǵa jáne internet resýrstaryna qosymsha qun salyǵyn 10% deńgeiinde qaldyrý. Bárimiz biletin támsil bar ǵoi: kim aqparatqa ielik etse, sol álemge ielik etedi degen. Sondyqtan osy baǵytta otandyq BAQ-tyń básekelestikke qabilettiligin, durys aqparat taratýyn saqtap qalý kerek", - dep túiindedi ol.
Jumanǵarinniń jaýaby
Vitse-premer - ulttyq ekonomika ministri Serik Jumanǵarin depýtattyń saýalyna jaýap berip, jeńildik qarastyrylmaitynyn jetkizdi.
"BAQ-qa biz tolyǵymen 16% QQS-ty joldaimyz. Sol sebepti eshqandai jeńildikter kózdelmegen. Ol árbir BAQ-tyń jalpy jylda eseptelgen taýar ainalymyna bailanysty bolady. QQS-nyń shekti mánin biz qoldadyq. 40 million teńge. Ol degen aqiqat zat esepteimin. Sheteldik BAQ kelse, olar da tóleidi. Sol sebepti árbir BAQ-tyń básekelestikke qabilettiligi onyń bergen aqparatynyń kópshilikke qyzyq ekenine, sapasyna bailanysty bolady. Jýrnal, gazet, internet, radio dep bólý durys emes dep esepteimiz", - dedi ministr.
